Sushil Kumar Granted Bail: कुस्तीपटू सागर धनखरच्या हत्येप्रकरणी तुरुंगात असलेला कुस्तीपटू सुशील कुमार याला जामीन मिळाला आहे. ऑलिम्पियन सुशील कुमारला 12 नोव्हेंबरपर्यंत अंतरिम जामीन मंजूर करण्यात आला आहे. त्याला 13 नोव्हेंबर रोजी कारागृहात आत्मसमर्पण करावे लागणार आहे.

दरम्यान, पत्नीच्या आजारपणाचे कारण देत जामीन अर्ज दाखल करण्यात आला होता. रोहिणी न्यायालयाचे अतिरिक्त जिल्हा आणि सत्र न्यायाधीश शिवाजी आनंद यांनी सुशील कुमारला जामीन मंजूर केला आहे. त्याचबरोबर सागरचे कुटुंबीय सुशीलच्या जामिनाला विरोध करत होते. जामिनाविरोधात सागरचे कुटुंबीय न्यायालयात जाणार आहे.

दुसऱ्या आरोपीला पॅरोल

यापूर्वी, न्यायालयाने या खून प्रकरणातील एका आरोपीला परीक्षेला बसण्यासाठी कोठडीत पॅरोल मंजूर केला होता. आरोपी गौरव लाउरा याने 5 नोव्हेंबर आणि 9 नोव्हेंबर रोजी परीक्षेला बसण्यासाठी कोठडीत जामीन किंवा पॅरोल मंजूर करण्यासाठी अर्ज केला होता.

अतिरिक्त सत्र न्यायाधीश शिवाजी आनंद यांनी दिलेल्या आदेशानुसार, आरोपीला 5 नोव्हेंबर 2022 आणि 9 नोव्हेंबर 2022 रोजी दुपारी 12 ते 6 या वेळेत परीक्षेला बसण्यासाठी कोठडीत पॅरोल मंजूर करण्यात आला आहे.

न्यायाधीशांनी सांगितले की, 'आरोपी हा बारावीचा विद्यार्थी आहे. त्याला यापूर्वीही परीक्षेसाठी पॅरोल मंजूर झाला होता.' न्यायालयाने पुढे सांगितले की, 'संबंधित खर्चासाठी आरोपींना 20,000 रुपये तुरुंग प्रशासनाकडे जमा करावे लागतील आणि उर्वरित रक्कम सरकारकडून घेतली जाईल.'

दुसरीकडे, पूर्व ज्युनियर राष्ट्रीय कुस्ती चॅम्पियन सागर धनखर याच्या हत्येप्रकरणी न्यायालयाने 12 ऑक्टोबर रोजी गौरव लाउरा, ऑलिम्पिक पदक विजेता कुस्तीपटू सुशील कुमार (Sushil Kumar) आणि अन्य 15 जणांविरुद्ध भारतीय दंड संहितेच्या विविध तरतुदींनुसार आरोप निश्चित केले होते. खून, खुनाचा प्रयत्न, दंगल, बेकायदेशीर कामात सहभाग अशा गुन्ह्यांसाठी न्यायालयाने आरोप निश्चित केले. न्यायालयाने दोन फरार आरोपींवरही (Accused) आरोप निश्चित केले आहेत.

शिवाय, 4 मे 2021 रोजी सुशील कुमार आणि त्याच्या साथीदारांनी सागरचे अपहरण करुन त्याची हत्या केली होती. घटनेपासून सुशील फरार होता. नंतर त्याला दिल्ली पोलिसांच्या (Delhi Police) स्पेशल सेलने अटक केली. या प्रकरणाचा सुरुवातीला स्थानिक पोलिसांकडून तपास केला जात होता. नंतर तो दिल्ली पोलिसांच्या गुन्हे शाखेकडे वर्ग करण्यात आला.