पणजी : ओमिक्रॉनच्या पार्श्वभूमीवर गोव्याच्या शेजारील राज्यांनी नाईट कर्फ्यू (Night Curfew) लागू केला आहे. त्यामुळेच खबरदारीचा उपाय म्हणून गोव्यातही नाईट कर्फ्यू लागू करावा, अशी शिफारस तज्ज्ञ समितीने केली आहे. हॉटेलमध्ये राहणाऱ्या पर्यटकांची आरटीपीसीआर चाचणी करण्याचा सल्लाही देण्यात आला आहे. सक्रिय बाधितांची संख्या 1 हजाराहून अधिक झाल्यास शाळा बंद करण्याची शिफारस समितीने केली आहे.

अन्य राज्यांत ओमिक्रॉनचे (Omicron Variant) रुग्ण वाढत असतानाच सोमवारी गोव्यातही ओमिक्रॉनचा पहिला रुग्ण आढळला आहे. याबरोबरच कोरोना बाधितांची संख्याही वाढत असल्यामुळे सोमवारी तज्ज्ञ समितीची बैठक झाली. या समितीमध्ये आरोग्य संचालक, गोमेकॉचे डीन डॉ. शिवानंद बांदेकर, डॉ. शेखर साळकर तसेच अन्य तज्ज्ञ डॉक्टर सदस्य आहेत.

सोमवारी झालेल्या या तज्ज्ञ समितीच्या बैठकीनंतर बुधवारी कृती समितीचीही बैठक होणार आहे. मागील दोन महिन्यांत कोरोनाबाधित मिळण्याचे वाढलेले प्रमाण आणि संख्या यांचा आढावा या बैठकीत घेतला जाईल.

राज्यात (Goa) सक्रिय कोरोनाबाधितांची संख्या 1 हजारांच्यावर गेल्यास राज्याच्या सीमांवर चाचणी करावी, तसेच बाधितांचे प्रमाण 3.5 टक्क्यांवर पोहोचल्यास शाळांतील वर्ग बंद करावे, असंही तज्ज्ञ समितीने सुचवलं आहे. यासोबतच सीमांवरच प्रवाशांची चाचणी करावी आणि हॉटेल, रेस्टॉरंटवर 50 टक्के क्षमतेने चालवण्याचे निर्बंध घालावेत, अशी शिफारस समितीने केली आहे.

राज्यात सक्रिय बाधितांची संख्या 3 हजारांहून अधिक झाल्यास पर्यटन कार्यक्रम, चित्रपटगृह, जलतरण तलाव, मॉल बंद करावेत, अशी शिफारस करण्यात आली आहे. सक्रिय बाधितांची संख्या 10 हजारांहून अधिक झाल्यास राज्यात अधिकाधिक निर्बंध (Restriction) घालण्यासह लॉकडाऊनही (Lockdown) करण्यास हरकत नसल्याचं तज्ज्ञ समितीने सुचवलं आहे.