Margao Railway Station: कोकण रेल्वे कॉर्पोरेशन लिमिटेडने मडगाव रेल्वे स्थानकाचा पुनर्विकास करण्याचे ठरवले आहे. त्यासाठी कोकण रेल्वेने आर्किटेक्चरल आणि तांत्रिक सल्ला मसलत प्रदान करण्यासाठी ई-निविदांद्वारे रिक्वेस्ट फॉर प्रपोजल (RFP) मागवले आहे. (Kokan Railway Corporation Limited)

मडगाव रेल्वे स्थानकाच्या एकात्मिक पुनर्विकासात व्यवहार्यता, मास्टर प्लॅनिंग, नगर रचना, अभियांत्रिकी आणि तपशीलवार प्रकल्प अहवाल (DPR) तयार करण्याशी संबंधित सल्लागार सेवांची मागणी याद्वारे केली आहे. 12 जून रोजी निविदा उघडल्या जातील.

मडगावचे आमदार दिगंबर कामत यांनी रेल्वेमंत्री अश्विनी वैष्णव यांना मडगाव स्थानकाच्या पायाभूत सुविधांमध्ये सुधारणा करण्याची विनंती केली होती.

कोकण रेल्वेचे चेअरमन कम मॅनेजिंग डायरेक्टर यांच्यासोबत झालेल्या बैठकीत मडगाव स्थानक पुनर्विकासासाठी प्राधान्याने घेण्याच्या सूचना आधीच मिळाल्या आहेत, असे कामत यांनी सांगितले होते. गोव्याच्या राज्यपालांनीही यासाठी आग्रह धरला होता.

मडगाव रेल्वे स्थानकाच्या आजूबाजूच्या परिसरालाही यामुळे नवसंजीवनी मिळू शकते. रेल्वे स्थानकाकडे जाणाऱ्या रस्त्यांचे सुशोभीकरण, यात रावणफोंड पूल ते खारेबंद पूल आणि रावणफोंड पूल ते व्हिक्टर हॉस्पिटल हे रस्ते तसेच ट्रॅफिक आयलंडचे पुनर्रचना करण्यात येणार आहे.

2017 मध्ये कोकण रेल्वेने पुनर्विकासासाठी हाती घेतलेल्या 10 रेल्वे स्थानकांमध्ये मडगाव, पेडणे आणि थिवी यांचा समावेश होता.

पुनर्विकास प्रकल्पामध्ये प्लॅटफॉर्म/मॉड्युलर निवारा, बायो-टॉयलेट, सीसीटीव्ही, मोफत वाय-फाय, टॉयलेट्स, अतिरिक्त काँक्रीट बेंच, नवीन वेटिंग हॉल, बुकिंग ऑफिस, एस्केलेटर, अतिरिक्त लूप लाईन्स, एथनिक फूड स्टॉल, एलईडी दिवे, स्टेशन-प्लॅटफॉर्मचा विस्तार, वाढीव पार्किंग क्षमता, एटीएम, डिजिटल प्रवासी माहितीफलक इत्यादींचा समावेश आहे.