Goa Election 2022: कॉंग्रेस पक्षाचे (Congress) नेते गेले अनेक महिने युतीबाबत बोलण्याचे टाळत होते. मात्र, शेवटी आज कॉंग्रेसने युतीचे संकेत (Indications of alliance) दिले. गोवा राज्य कॉंग्रेस प्रभारी दिनेश गुंडू राव (Goa Congress In charge Dinesh Gundu Rao) यांनी समविचारी पक्षासोबत कॉंग्रेस युती करण्यास तयार असल्याचे वक्तव्य आज केले.

एका वृत्तवाहिनीशी बोलताना राव यांनी सांगितले की, समविचारी पक्षांसोबत युती करण्याच्या प्रस्तावावर चर्चा करण्यास आम्ही तयार आहोत. आम्ही कॉंग्रेसमध्ये आणखी फूट पडू नये यासाठी सतर्क आहोत. लोकांशी बांधिलकी व विश्‍वासपात्र उमेदवार आम्ही निवडणुकीत उतरवणार आहोत, असेही राव यांनी यावेळी सांगितले.

राष्ट्रवादी कॉंग्रेस पक्षासोबतच गोवा फॉरवर्ड पक्षही कॉंग्रेससोबत युती करून निवडणुक लढविण्यास इच्छुक आहे. त्यासाठी वरील दोन्ही पक्षांनी कॉंग्रेसकडे प्रस्ताव ठेवले होते व युतीबाबत लवकर निर्णय घ्या, असे सांगून दोन ते तीन तारखाही दिल्या होत्या. मात्र, आम्ही ४० ही मतदारसंघात तयारी सुरू केली आहे.

सर्व मतदारसंघात कॉंग्रेसला अनुकूल वातावरण आहे असे सांगून कॉंग्रेसचे नेते युतीबाबत काहीच बोलण्यास तयार नव्हते. गोवा काँग्रेसचे मुख्य निवडणूक निरीक्षक म्हणून नियुक्त झालेले माजी केंद्रीय गृहमंत्री पी. चिदंबरम यांनीसुद्धा आपल्या दोन्ही भेटीवेळी युतीबाबत पत्रकारांनी विचारूनही युतीविषयी काहीच सांगितले नव्हते.

काल माजी मुख्यमंत्री व ज्येष्ठ कॉंग्रेस नेते लुईझिन फालेरो यांनी कॉंग्रेस पक्षासोबतच आमदारकीचा राजीनामा दिल्यामुळे हादरलेल्या कॉंग्रेसला युतीची गरज वाटू लागली आणि त्या गरजेतूनच आज राव यांनी समविचारी पक्षासोबत युतीसाठी आम्ही तयार असल्याचे प्रतिपादन केले.

फुटीरांना प्रवेश नाहीच

मागील निवडणुकीत कॉंग्रेसच्या उमेदवारीवर निवडून येऊन भाजपात दाखल झालेल्या फुटीर आमदारांना कॉंग्रेस कदापी पुन्हा पक्षात घेणार नाही उमेदवारी तर दूरची गोष्ट आहे

- दिनेश गुंडू राव, गोवा काँग्रेस प्रभारी