गोव्याची राजधानी पणजीमध्ये स्मार्ट सिटी योजनेतून सुरू असलेल्या कामांमुळे संपूर्ण शहरात खोदकाम करण्यात आले आहे. त्यामुळे शहरात वाहतूक कोंडी आणि मनस्ताप ही नित्याचीच बाब झाली आहे. त्यातच आता पाऊसही हजेरी लावत आहे.

त्यामुळे सर्वसामान्यांच्या त्रासात आणखीच भर पडत आहे. या पार्श्वभुमीवर मुख्यमंत्री डॉ. प्रमोद सावंत यांनी मंगळवारी रात्री पणजीतील स्मार्ट सिटीच्या कामांची पाहणी केली.

(CM Pramod Sawant inspects Smart City Work in Panaji)

मुख्यमंत्री सावंत यांनी सांतीनेज ते काकुलो मॉल या मार्गावरील कामांची माहिती घेतली. येथे रस्त्याचे काम सुरू आहे. उन्हात या रस्त्यावर धुळीचे साम्राज्य आणि पावसात चिखलाचे साम्राज्य असे चित्र असते. या कामाची माहिती मुख्यमंत्र्यांनी घेतली.

यावेळी बोलताना मुख्यमंत्री सावंत म्हणाले की, सिमेंटच्या रस्त्याचे काम पावसातही सुरू राहिल, पावसात हे काम सुरू राहू शकते. त्यामुळे काहीही अडचण येणार नाही, ऑक्टोबरअखेर कोणतेही काम शिल्लक राहणार नाही, असा विश्वासही मुख्यमंत्र्यांनी व्यक्त केला.

ड्रेनेज पाईपलाईन घालण्याचे काम पावसाळ्यात केले जाईल. पावसाळ्यात एका महिन्यात हे काम पुर्ण करण्याचे नियोजन आहे. लोकांना थोडाफार त्रास होईल. कोणत्याही कामात खंड पडणार नाही. पावसाचा कोणताही अडथळा या कामांत येणार नाही.

मुख्यमंत्री म्हणाले की, भविष्यात धुळ होणार नाही. त्यासाठीच ही कामे पावसाळ्यात सुरू राहतील. ऑक्टोबरनंतर सिमेंट रस्त्यांचे काम केले जाईल. पणजीमध्ये पाणी तुंबण्याची जी समस्या उद्भवते त्याचे कारण पावसाळ्यात काम सुरू असताना कळणार आहे.

काँक्रिट रस्त्यांच्या कामांना पावसामुळे काहीही अडचण येणार नाही. त्यातून ड्रेनेजची समस्या कायमस्वरूपी मिटवली जाईल. हे काम देखील पावसात करणे शक्य आहे, असे ते म्हणाले.