Girdoli: 10 दिवस पाणीपुरवठा ठप्प, विहिरीचे पाणी आटले; संतप्त ग्रामस्थांचा अभियंत्याला घेराव

सासष्टी: कोलीमोड्डी, गिरदोळी येथे गेले दहा दिवस पाणीपुरवठा ठप्प असल्याने स्थानिकांचे हाल झाले आहेत. गुरुवारी स्थानिकांनी बड्डे येथील पीडब्ल्यूडी कचेरीत येऊन सहाय्यक अभियंता दिपक देसाई यांना घेराव घालत धारेवर धरले.

लवकरात लवकर गावात पाणीपुरवठा करावा, अशी मागणी स्थानिकांनी यावेळी केली. येथील विहिरीतील पाणी देखील आटलेले आहे, असे त्यांनी सांगितले. गिरदोळीचे पंच फ्रॅंकी रॉड्रिग्स स्थानिकांसोबत होते. रॉड्रिग्स यांनी सांगितले की, आम्ही कित्येक वेळा कचेरीत येऊन गेलो;

पण प्रत्येक वेळी अभियंता गैरहजर असल्याचे दिसून आले. कचेरीतील कर्मचारीसुद्धा नेमके ते कुठे गेले, हे सांगू शकले नाहीत. नोव्हेंबरमध्ये पाऊस संपला आणि तेव्हापासून पाण्याची समस्या सुरू झाली. आता ते तिथे नवीन जलवाहिनी घालणार असल्याचे सांगतात.

नवीन जलवाहिनी घालणार

या संदर्भात सहाय्यक अभियंता दिपक देसाई यांनी सांगितले की, या भागात पाणीपुरवठा करणारी एसी जलवाहिनी ३० वर्षांपूर्वीची आहे. पाण्याचा दाब वाढला तर ती फुटते. सध्या जलवाहिनी फुटलेली आहे. आम्ही नवीन जलवाहिनी गिरदोळी-माकाझनकडून घालण्याच्या प्रयत्नात आहोत.