काणकोण: गोकर्ण पर्तगाळी मठाच्या वर्धापनदिनानिमित्त सुरू असलेली सर्व कामे २५ नोव्हेंबरपर्यंत पूर्ण करण्यात येतील, असे आयोजन समितीचे संयुक्त सचिव दिनेश पै यांनी सांगितले.

१२ हजार चौरस मीटर जागेत रामायण पार्क उभारण्यात येत आहे. याठिकाणी पूर्वी गोशाळा होती. त्याच ठिकाणी आधुनिकीकरणाचा एक भाग तसेच युवा पिढीला मठाकडे आकर्षित करण्यासाठी ॲम्‍फी थिएटर उभारण्यात येत आहे.

मठात रामनवमीसाठी येणाऱ्या मठानुयायींच्‍या निवासाची सोय केली आहे. त्‍यावेळी रथविधी होतो. त्याचा २० हजार भाविकांना आनंद लुटता यावा, यासाठी प्रशस्त मैदानाची निर्मिती केली आहे, असे दिनेश पै यांनी सांगितले.

नव्या प्रकल्पाची खासियत

दिल्ली येथील राष्ट्रीय पुरस्कारप्राप्त कलाकार अनिल सुतार यांच्याकडून ब्राँझ धातूपासून ७७ फूट उंचीचा श्रीरामाचा पुतळा उभारण्यात येत आहे.

वीर विठ्ठल मंदिराचे निर्माण करण्यात आले आहे. ३३० वर्षे जुन्या श्रीराम मंदिराचे नूतनीकरण व विस्तार करण्यात आला आहे.

स्वामीजी आरती करतात, त्यावेळी किमान चारशे मठानुयायांना बसून आराधना करता यावी, या उद्देशाने या मंदिराची बांधणी केली आहे.

शिवाय शिखर कलश, ताम्रपट यांची बांधणी केली आहे. मठात संस्कृत पाठशाळा होती. स्वामीजींच्या निर्देशानुसार तिचे नूतनीकरण करून व्याख्यात्यांसाठी स्वतंत्र निवासी खोल्या, वर्ग तसेच भटजींच्या निवासाची व्यवस्था केली आहे.