वॉशिंग्टन: इस्राईलचे पंतप्रधान बेंजामिन नेतान्याहू यांनी अमेरिकेचे अध्यक्ष डोनाल्ड ट्रम्प यांची भेट घेतली. यानंतर दोन्ही नेत्यांनी इराणवर निर्णायक विजय मिळाल्याचा दावा करतानाच पश्‍चिम आशियातील स्थिती लवकरच पूर्वपदावर येईल, असा विश्‍वास व्यक्त केला. नेतान्याहू यांनी यावेळी नोबेल शांतता पुरस्कारासाठी ट्रम्प यांच्या नावाची शिफारस करत असल्याचे जाहीर केले.

गाझा पट्टीतील संघर्षाला विराम देण्याबाबत चर्चा करण्यासाठी नेतान्याहू यांनी आज ‘व्हाइट हाउस’मध्ये ट्रम्प यांची भेट घेतली. शिष्टमंडळ पातळीवर झालेल्या भेटीत दोन्ही नेत्यांनी इराणबरोबरील संघर्षाचा आढावा घेतला. तसेच, गाझामध्ये दोन महिन्यांची शस्त्रसंधी लागू करण्याबाबतही दोन्ही नेत्यांमध्ये खलबते झाली.

या शस्त्रसंधीसाठी ट्रम्प हे किती कठोर धोरण राबविणार, याची चाचपणी नेतान्याहू यांनी यावेळी केल्याचे समजते. या चर्चेनंतर माध्यमांसमोर मात्र दोघांनी इराणवर विजय मिळविल्याचा दावा करतानाच पश्‍चिम आशियामध्ये शांततेचे नवे युग सुरू होईल, अशी आशा व्यक्त केली. ट्रम्प म्हणाले,‘‘पश्‍चिम आशिया लवकरच पूर्वपदावर येईल, अशी मला खात्री आहे. यापुढे इराण आमचा आणि इस्राईलचा निश्‍चितच आदर करेल.

नोबेलसाठी शिफारस

इस्राईलचे पंतप्रधान बेंजामिन नेतान्याहू यांनी नोबेल शांतता पुरस्कारासाठी डोनाल्ड ट्रम्प यांच्या नावाची शिफारस केली आहे. ट्रम्प हे एकापाठोपाठ एका वादामध्ये शांतता घडवून आणत आहेत, असे नेतान्याहू म्हणाले. इराणवर लष्करी कारवाई करण्याची मागणी नेतान्याहू यांनी अमेरिकेच्या आधीच्या अध्यक्षांकडेही अनेकवेळा केली होती.

ट्रम्प यांनी अशी कारवाई करताना मागील महिन्यात इराणच्या अणुकेंद्रावर ‘बंकर बस्टर’ बाँब टाकला होता. त्यामुळेच नेतान्याहू यांनी त्या बदल्यात नोबेलसाठी ट्रम्प यांची शिफारस केल्याचे मानले जाते.