भारतीय सिनेमा आज एका नव्या वळणावर उभा आहे. व्यावसायिक सिनेमाबरोबर समांतर सिनेमाकडेही हळूहळू दर्शक आकर्षित होऊ लागले आहेत. ओटीटी (OTT) प्लॅटफॉर्मवर थेट आयुष्याशी भिडणारे, ज्यातऱ्हेचे प्रभावी सिनेमा प्रदर्शित होत आहेत आणि ज्या संख्येने ते पाहिले जात आहेत ते पाहता ही अर्थपूर्ण सिनेमांची लाट हळूहळू प्रेक्षकांची मने जिंकत चालली आहे हे स्पष्ट होत आहे. हल्ली सोशल मीडियावर व्यावसायिक सिनेमाबरोबरच अशातऱ्हेच्या समांतर सिनेमाचीदेखील चर्चा तावातावाने होताना दिसते आणि सर्वात महत्वाचे म्हणजे हे सिनेमा निर्माण करणारी मंडळी ही बहुशः तरुण असते. ती नव्या अभिनेत्याला संधी देते, ती नोन ॲक्टर्स बरोबर काम करताना कचरत नाही.

यंदाच्या 52 व्या इफ्फीत (IFFI 2021) प्रतिभावान आणि महत्त्वाकांक्षी अशा तरुणाईचा शोध लागलेला असेल. या इफ्फीने चित्रपटक्षेत्रात धडाडीने आणि प्रतिभेने काम करून इच्छिणाऱ्या तरुण सिनेकर्मीना चित्रपट उद्योगात पाय रोवण्याची संधी दिलेली आहे. 52 व्या आंतरराष्ट्रीय चित्रपट महोत्सवाने, माहिती आणि प्रसारण मंत्राच्या सौजन्याने त्यासाठी या उद्देशाने एक विशेष स्पर्धा आयोजित केली होती. यासंबंधी माहिती आणि प्रसारण खात्याचे मंत्री अनुराग ठाकूर यांनी आपल्या ट्विटमध्ये तरुण सिनेकर्मीना आवाहन करताना म्हटले होते. ‘युवा सिनेकर्मीनो, ही तुमच्यापैकी 75 जणांना मिळणारी संधी आहे. आम्ही भारतातल्या भविष्यकालीन सर्जनशील मनांचा शोध घेत आहोत. 35 वर्षाखालच्या 75 सर्जनशील मनांचा शोध! ही एक लक्षणीय संधी आहे!’

या स्पर्धेतून निवड झालेल्या युवा-युवतीना चित्रपट उद्योगातील जेष्ठांबरोबर वार्तालाप करण्याची संधी मिळेल शिवाय ते इफ्फीत आयोजित होणाऱ्या मास्टर-क्लासना ते हजेरी लावू शकतील. क्रीडा क्षेत्राप्रमाणेच चित्रपटक्षेत्रातही अशाप्रकारे युवा प्रतिभेला हेरणे हा माहिती आणि प्रसारण मंत्रालयाचा एक अत्यंत स्तुत्य प्रयत्न आहे. 52 व्या इफ्फीत सुरू झालेली ही नवी सुरुवात भारतीय सिनेमाला नवीन प्रतिभावंत मिळवून देईल अशी आशा करायला हरकत नाही.