कोल्हापुरी चपलेने भावाने मारहाण केल्याप्रकरणी बीडमध्ये एक तक्रार दाखल करण्यात आली होती. गुन्हा दाखल झाल्यानंतर कोल्हापुरी चपलेने गंभीर दुखापत कशी होईल? असा मुद्दा उपस्थित करत त्यांनी औरंगाबाद खंडपीठात धाव घेतली. दरम्यान, न्यायालयाने दोन्ही संशयित आरोपांची निर्दोष मुक्तता केली.

तसेच, कोल्हापुरी चप्पलला 'जीवघेणे हत्यार' नाही, असा निर्वाळा देखील औरंगाबाद खंडपीठाने दिला आहे. मुंबई उच्च न्यायालयाच्या औरंगाबाद खंडपीठाने खटला रद्द केला असून, कोल्हापुरची रांगडी ओळख असलेल्या कोल्हापुरी चप्पलची न्यायालयातून निर्दोष मुक्तता झाली आहे.

काय म्हणाले न्यायालय?

भादंवि कलम 324 नुसार फौजदारी खटला औरंगाबाद खंडपीठाने रद्द केला आहे. कोल्हापुरी चप्पलला 'जीवघेणे हत्यार' म्हणता येणार नाही, असे न्यायालयाने म्हटले आहे. औरंगाबाद खंडपीठाच्या न्या. अनुजा प्रभुदेसाई आणि न्या. आर. एम. जोशी यांनी यांनी याबाबत निकाल दिला आहे.

काय आहे नेमकं प्रकरण?

ही घटना घडली बीड जिल्ह्यामधील केज तालुक्यात. झाले असे की मंगेश मंचकराव देशमुख आणि त्यांची पत्नी श्रद्धा यांनी मंगेशचा सख्खा भाऊ अनंत देशमुख यांना कोल्हापुरी चपलेने मारहाण केली. याबाबत अनंत यांनी दिलेल्या तक्रारीवरून पोलिसांनी पती-पत्नी विरुद्ध भादंवि कलम 452,324,323,504 अन्वये दखलपात्र गुन्हा दाखल केला.

मात्र, कोल्हापुरी चपलेने गंभीर दुखापत कशी होईल? असा प्रश्न उपस्थित करत पती-पत्नीने औरंगाबाद खंडपीठात धाव घेतली. अॅड. हनुमंत जाधव यांच्यामार्फत त्यांनी सदर गुन्हा आणि खटला रद्द व्हावा अशी मागणी केली.

याच प्रकरणी निकाल देताना कोल्हापुरी चप्पल जिवघेणे हत्यार होऊ शकत नाही असे म्हणत न्यायालयाने दखलपात्र गुन्ह्यासह फौजदारी खटला रद्द केला आहे.