वय वाढलं असलं तरी मैदानावरील आक्रमक अंदाज अजूनही कायम असल्याचं युवराज सिंहने पुन्हा एकदा दाखवून दिलं आहे. वर्ल्ड चॅम्पियनशिप ऑफ लिजेंड्स (WCL) २०२६ च्या सलामीच्या सामन्यात युवराजने आपल्या तुफानी फलंदाजीने चाहत्यांचं लक्ष वेधून घेतलं. इंडिया चॅम्पियन्स आणि ऑस्ट्रेलिया चॅम्पियन्स यांच्यात शारजाहमध्ये झालेल्या सामन्यात युवराजने अवघ्या ४४ चेंडूत ७१ धावांची शानदार खेळी केली. या खेळीत त्याने तब्बल ६ षटकार आणि ५ चौकार ठोकले.
इंडिया चॅम्पियन्सने प्रथम फलंदाजी करताना डावाची सुरुवात फारशी चांगली केली नाही. नमन ओझा, अंबाती रायुडू आणि स्टुअर्ट बिन्नी यांना मोठी खेळी करता आली नाही. त्यामुळे भारतीय संघावर दबाव निर्माण झाला होता. मात्र, युवराज सिंह मैदानात आल्यानंतर सामन्याचं चित्रच बदललं.
युवराजने सुरुवातीपासूनच ऑस्ट्रेलियन गोलंदाजांवर आक्रमण करण्यास सुरुवात केली. त्याच्या फटकेबाजीसमोर गोलंदाज निष्प्रभ ठरले. त्याने ४४ चेंडूत ७१ धावा करताना ५ चौकार आणि ६ षटकार मारले. त्याचा स्ट्राइक रेट तब्बल १६१.३६ इतका राहिला.
युवराजच्या या खेळीतील षटकारांचा व्हिडिओ सोशल मीडियावर मोठ्या प्रमाणात चर्चेत आहे. विशेष म्हणजे ४४ वर्षांच्या युवराजने दाखवलेली आक्रमक फलंदाजी पाहून चाहते जुन्या 'युवी'च्या आठवणींमध्ये रमले आहेत. त्याने एकाच षटकात सलग सहा षटकार मारले नसले, तरी संपूर्ण खेळीत त्याने सहा वेळा चेंडू सीमारेषेपलीकडे पाठवला.
युवराजच्या या शानदार खेळीमुळे इंडिया चॅम्पियन्सने निर्धारित २० षटकांत ७ विकेट गमावत १९६ धावा उभारल्या. त्यामुळे ऑस्ट्रेलिया चॅम्पियन्ससमोर विजयासाठी १९७ धावांचे आव्हान होते.
१९७ धावांच्या लक्ष्याचा पाठलाग करताना ऑस्ट्रेलिया चॅम्पियन्सने सुरुवात चांगली करण्याचा प्रयत्न केला. डार्सी शॉर्टने आक्रमक फलंदाजी करत संघाला चांगली सुरुवात करून दिली. मात्र, त्याला इतर फलंदाजांकडून अपेक्षित साथ मिळाली नाही.
भारतीय गोलंदाजांनी त्यानंतर सामन्यावर पूर्णपणे नियंत्रण मिळवलं. धवल कुलकर्णी आणि मोहित शर्मा यांनी ऑस्ट्रेलियन फलंदाजांना चांगलंच अडचणीत आणलं. धवलने ४ षटकांत ४४ धावा देत ४ विकेट घेतल्या, तर मोहित शर्माने ३ षटकांत ३२ धावा देत ३ बळी टिपले. पीयूष चावलाला २ आणि हरभजन सिंहला १ विकेट मिळाली.
ऑस्ट्रेलिया चॅम्पियन्सचे तीन फलंदाज खातेही न उघडता माघारी परतले. अखेर भारतीय गोलंदाजांच्या भेदक माऱ्यासमोर ऑस्ट्रेलियन संघ लक्ष्यापासून दूर राहिला. इंडिया चॅम्पियन्सने हा सामना तब्बल ४६ धावांनी जिंकत WCL २०२६ ची विजयी सुरुवात केली.
युवराजच्या ७१ धावांच्या तुफानी खेळीने या सामन्याला विशेष रंगत आणली. फलंदाजीनंतर भारतीय गोलंदाजांनीही शानदार कामगिरी करत विजयावर शिक्कामोर्तब केलं.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.