WPL 2024, Gujarat Giants vs UP Warriorz: महिला प्रीमियर लीग 2024 चा 18 वा सामना दिल्लीतील अरुण जेटली स्टेडियमवर यूपी वॉरियर्स आणि गुजरात जायंट्स यांच्यात खेळला गेला. या सामन्यात गुजरात जायंट्सने यूपी वॉरियर्सचा पराभव केला.

दीप्ती शर्माच्या झंझावाती खेळीनंतरही यूपी वॉरियर्सला 8 धावांनी पराभवाचा सामना करावा लागला. या विजयानंतर गुजरात जायंट्सने प्लेऑफच्या आशा जिवंत ठेवल्या आहेत. मात्र, यूपी वॉरियर्सचा पराभव करुनही गुणतालिकेत गुजरात जायंट्स तळाच्या स्थानावर आहे.

मुंबई इंडियन्सशिवाय दिल्ली कॅपिटल्सने प्लेऑफसाठी क्वॉलिफाय केले आहे. तर उर्वरित 1 जागेसाठी 3 संघ दावेदार आहेत. मात्र या 3 संघांमध्ये रॉयल चॅलेंजर्स बंगळुरुचा सर्वाधिक प्रबळ दावा आहे.

दीप्तीची खेळी व्यर्थ

दरम्यान, यूपीकडून दीप्ती शर्माने शेवटपर्यंत झुंज दिली, पण तिला संघाला विजयापर्यंत नेण्यात अपयश आले. दीप्तीने 60 चेंडूत 88 धावांची नाबाद खेळी खेळली. तिने आपल्या खेळीत 9 चौकार आणि 4 षटकार मारले. दीप्तीला पूनम खेमनारची साथ लाभली, तिने 36 चेंडूत नाबाद 36 धावांची महत्त्वपूर्ण खेळी खेळली. या दोघींनी 5व्या विकेटसाठी 109 धावांची उत्कृष्ट भागीदारी केली. मात्र, या दोघींशिवाय इतर कोणत्याही फलंदाजाला म्हणावी तशी कामगिरी करता आली नाही.

तत्पूर्वी, गुजरात जायंट्सने नाणेफेक जिंकून पहिल्यांदा फलंदाजी करण्याचा निर्णय घेतला आणि 8 गडी गमावून 152 धावा केल्या होत्या. गुजरातसाठी मुनीने 52 चेंडूंत 10 चौकार आणि एका षटकाराच्या मदतीने नाबाद 74 धावांची खेळी केली. मुनीशिवाय लॉरा वोलवॉर्टने (43) धावा केल्या.

या दोघींनी पहिल्या विकेटसाठी 60 धावा जोडून संघाला चांगली सुरुवात करुन दिली. या दोघींशिवाय संघाचा अन्य कोणताही फलंदाज क्रिझवर टिकू शकला नाही. एक्लेस्टनच्या अंतिम षटकात मुनीने पाच चौकार मारले. शेवटच्या दोन षटकात 32 धावा जोडण्यात गुजरात संघाला यश आले. यूपीकडून सोफी एक्लेस्टनने सर्वाधिक 3 तर दीप्ती शर्माने 2 बळी घेतले.

गुणतालिकेत गुजरातचे स्थान

गुणतालिकेत यूपीविरुद्धच्या या विजयाचा फायदा गुजरातला मिळाला नाही. गुजरातचा संघ अजूनही गुणतालिकेत तळाशी आहे. गुजरातचा 7 सामन्यांमधला हा दुसरा विजय आहे तर यूपी 8 सामन्यात 3 विजय नोंदवून गुणतालिकेत चौथ्या स्थानावर आहे. दिल्ली आणि मुंबई प्लेऑफसाठी पात्र ठरले आहेत.