Ghodemodni: 'बोला पुंडलिक वर दे..'! अभूतपूर्व जल्लोषात सर्वणची घोडेमोडणी साजरी; शेकडो नागरिकांची उपस्थिती

डिचोली: ढोल-ताशांचा निनाद आणि ''ह. ह. ह..हा...!'' च्या तालावर डिचोलीतील सर्वण गावातील शिमगोत्सवातील वैशिष्ट्यपूर्ण ‘घोडेमोडणी’ अभूतपूर्व उत्साहात आणि जल्लोषात साजरी करण्यात आली. घोडेमोडणीनंतर होमकुंडोत्सव साजरा करण्यात आला.

या घोडेमोडणीला शेकडो वर्षांची परंपरा आहे. यंदाही डिचोलीसह वेगवेगळ्या भागातील मिळून शेकडो नागरिकांनी उपस्थिती लावून या घोडेमोडणीचा मनसोक्त आस्वाद घेतला. मयेचे आमदार प्रेमेंद्र शेट यांनीही घोडेमोडणी वेळी ढोल बडवून घोडेमोडणीची मजा लुटली.

होळीपौर्णिमेच्या पाचव्या दिवशी सर्वणची ‘घोडेमोडणी’ साजरी करण्यात येते. शुक्रवारी रात्री १० वाजता पारंपरिक रोमटाचे श्री श्यामपुरुष मंदिरात आगमन झाल्यानंतर त्याठिकाणी लोकनृत्य सादरीकरण झाले. नंतर वडाजवळ रचण्यात आलेले होमकुंड पेटविण्यात आले. सजविलेल्या दोन्ही घोडेस्वारांना होळीजवळ आणण्यात आले.

त्याठिकाणी गाऱ्हाणे घातल्यानंतर ढोल-ताशे, झांज आणि ''ह. ह. हहा...’च्या ठेक्यावर आणि आबालवृद्धाच्या साथीत घोडेमोडणीचा ताल सुरु झाला. भाटले परिसरात पाच फेरे मारल्यानंतर घोडेमोडणीची सांगता झाली.

वेगवेगळ्या भागांतून गर्दी

घोडेमोडणी झाल्यानंतर मध्यरात्री होमकुंड उत्सव साजरा झाला. घोडेस्वार आणि भक्तगण तळीवर पवित्र स्नान करून आले. नंतर ''बोला पुंडलिक वर दे'' आदी जयघोष करीत भक्तगणांनी होमकुंडातील पेटत्या निखाऱ्यातून अग्नीदिव्य केले. भक्तगणांचे अग्नीदिव्य पाहण्यासाठीही वेगवेगळ्या भागातील लोकांनी गर्दी केली होती.