WPL 2023: भारतीय क्रिकेट नियामक मंडळाने मंगळवारी वूमन्स प्रीमियर लीग (WPL) 2023 हंगामाचे वेळापत्रक जाहीर केले आहे. या हंगामाचा लिलावा सोमवारीच मुंबईत पार पडला होता. त्यानंतर लगेचच दुसऱ्या दिवशी वेळापत्रक समोर आले आहे.

डब्ल्यूपीएलच्या पहिल्या हंगामात मुंबई इंडियन्स, दिल्ली कॅपिटल्स, गुजरात जायंट्स, रॉयल चॅलेंजर्स बेंगलोर आणि युपी वॉरियर्स हे पाच संघ खेळणार आहेत. दरम्यान या हंगामाला 4 मार्चपासून सुरूवात होणार आहे.

डब्ल्यूपीएलमध्ये 23 दिवसात एकूण 22 सामने खेळवण्यात येणार आहेत. यातील 20 सामने साखळी फेरीत पार पडतील. तर एक एलिमिनेटर आणि अंतिम सामना असे प्लेऑफचे 2 सामने असतील. गे सर्व सामने मुंबईतील डीवाय पाटील स्टेडियम आणि ब्रेबॉर्न स्टेडियमवर मिळून पार पडणार आहेत. दोन्ही स्टेडियमवर प्रत्येकी 11 सामने खेळवले जाणार आहेत.

तसेच एकूण 4 डबल हेडर (एका दिवशी दोन सामने) पार पडणार आहेत. डबल हेडरच्या दिवशी पहिला सामना दुपारी 3.30 वाजता सुरू होईल. तसेच दुसरा सामना 7.30 वाजता सुरू होईल.

या हंगामातील पहिला सामना डीवाय पाटील स्टेडियमवर गुजरात जायंट्स विरुद्ध मुंबई इंडियन्स संघात रंगणार आहे. या सामन्याने डब्ल्यूपीएलच्या पहिल्या हंगामाची सुरुवात होईल. तसेच साखळी फेरीतील अखेरचा सामना युपी वॉरियर्स विरुद्ध दिल्ली कॅपिटल्स संघात ब्रेबॉर्न स्टेडियमवर 21 मार्च रोजी खेळवला जाईल.

साखळी फेरीनंतर डीवाय पाटील स्टेडियमवर 24 मार्च रोजी एलिमिनेटरचा सामना होईल, तर ब्रेबॉर्न स्टेडियमवर 26 मार्च रोजी अंतिम सामना खेळवला जाणार आहे.

या हंगामासाठी झालेल्या लिलावात एकूण 87 खेळाडूंचा लिलाव लागला आहे. यामध्ये 30 परदेशी खेळाडूंचा समावेश आहे. या 87 खेळाडूंसाठी 5 फ्रँचायझींनी मिळून 59 कोटी 50 लाख रुपये खर्च केले आहेत.