Ravindra Jadeja Following Nathan Lyon: भारत विरुद्ध ऑस्ट्रेलिया संघात सध्या 4 सामन्यांची कसोटी मालिका सुरू आहे. या सामन्यात भारताने पहिले दोन्ही सामने जिंकून 2-0 अशी आघाडी घेतली आहे. या मालिकेतील दिल्लीत झालेला दुसरा कसोटी सामना भारताने रविवारी (19 फेब्रुवारी) जिंकला. दरम्यान, या सामन्यानंतर रविंद्र जडेजाने नॅथन लायनला 24 तासांसाठी इंस्टाग्रामवर फॉलो केले आहे.

दिल्ली कसोटीनंतर जडेजाने इंस्टाग्रामवर एक स्टोरी शेअर केली आहे. ज्यामध्ये त्याने त्याच्या इंस्टाग्राम अकाउंटचा स्क्रिनशॉट शेअर केला आहे. त्यात दिसते की त्याने एक अकाउंटला फॉलो केले आहे. दरम्यान, जडेजाने या स्टोरीच्या कॅप्शनमध्ये लिहिले आहे की 'माझा मित्र नॅथन लायनला मी 24 तासांसाठी फॉलो करत आहे.' जडेजाची ही स्टोरी ऑस्ट्रेलियाचा फिरकीपटू नॅथन लायननेही रिपोस्ट केली आहे.

दरम्यान, जडेजाची ही इंस्टाग्राम स्टोरी पाहून अनेकांना प्रश्न पडला की त्याने अशी स्टोरी का टाकली असावी. खरंतर इंस्टाग्रामवर 5 मिलियन फॉलोवर्स असणाऱ्या जडेजा कोणालाही फॉलो करत नाही.

याबद्दल दिल्ली कसोटीतील पहिल्या डावात लायनने जडेजाला आठवण करून दिली होती, असा सोशल मीडियावर दावा केला जात आहे.

लायन जडेजाला म्हणाला होता, 'तू मला इंस्टाग्रामवर फॉलोही नाही करत. मी तू मला फॉलो करण्याची वाट पाहात आहे. तू कोणालाच फॉलो करत नाही. तू फॉलो करू शकतो का?' जडेजा आणि लायनमधील हे संभाषण स्टंप माईकमध्ये कैद झाले होते. त्यानंतर आता जडेजाने लायनला 24 तासांसाठी फॉलो केले आहे.

रविंद्र जडेजाने दमदार पुनरागमन

रविंद्र जडेजा ऑस्ट्रेलियाविरुद्धच्या कसोटी मालिकेत खेळण्यापूर्वी गुडघ्यावरील शस्त्रक्रियेमुळे 5 महिने मैदानातून बाहेर होता. पण त्याने या कसोटी मालिकेतून आंतरराष्ट्रीय क्रिकेटमध्ये पुनरागमन केले. त्याचे हे पुनरागमन यशस्वी ठरले आहे.

त्याने ऑस्ट्रेलियाविरुद्धच्या पहिल्या दोन सामन्यांत खेळताना 4 डावात गोलंदाजी करताना 17 विकेट्स घेतल्या आहेत. तसेच त्याने पहिल्या सामन्यात 70 धावांची खेळी केली होती. त्याचबरोबर दुसऱ्या डावात भारतीय संघ संकटात असताना 26 धावांची खेळी केली होती. तसेच विराट कोहलीबरोबर 59 धावांची भागीदारी केली होती.

जडेजाला त्याच्या या शानदार कामगिरीमुळे दोन्ही सामन्यांमध्ये सामनावीराचा पुरस्कार मिळाला आहे.