टोकियो: टोकियो ऑलिंपिकमध्ये (Tokyo Olympics) भारताची आजची सकाळ गुड न्यूज घेऊन आली आहे. दीपिका कुमारीने (Deepika Kumari) तिरंदाजीत (Archery) सेनिया पेरोवाचा (Ksenia Perova) शूट ऑफमध्ये 6-5 असा पराभव करत उपांत्यपूर्व फेरीत धडक मारली आहे. शूट ऑफमध्ये पहिला शॉट पेरोवाने घेतला. त्यात तिने फक्त 7 चा स्कोर केला. दीपिकाने याच संधीचा फायदा घेत 10 चा स्कोर केला.

पहिल्या सेटमध्ये दीपिकाने 9-10 तर सेनिया पेरोवाने 9-9, दुसऱ्या सेटमध्ये दीपिका 10-9 तर पेरोवाने 9-8, तिसऱ्या सेटमध्ये दीपिका 10-9, तर पेरोवा 9-9, चौथ्या सेटमध्ये दीपिका 9-8 तर पेरोवा 9-8, पचव्या सेटमध्ये दीपिकाला 7-10, तर पेरोवाला 9-10 असे गुण मिळाल्याने सामना शूट ऑफमध्ये गेला तेथे दीपिकाने 10-7 अशा फरकाने पेरोवाला पराभूत केले. दुसरीकडे तिरंदाजीत संघ सोमवारी दक्षिण कोरिया सोबत झालेल्या पराभवामुळे ऑलिंपिकमधून बाहेर झाला आहे.

बॉक्सिंगमध्ये भारताचे पदक निश्चित

दुसरीकडे बॉक्सिंगमध्ये (boxing) लोव्हलिना बोरगोहेन (lovelina borgohain) हिने (69 किलो) मध्ये चिनी तैपेईच्या नियन-चिन चेनला पराभूत करत भारताचे पदक निश्चित केले आहे. आज झालेल्या यासामन्यात बोरगोहेनने नियन-चिन चेनचा 4-1 अशा फरकाने पराभव करत भारताच्या पदकावर शिक्का मोर्तब केला. पहिल्या दोन राऊंडमध्ये लोव्हलिनाने आपला दबदबा राखत आक्रमक खेळ केला. तिसऱ्या सेटमध्ये देखील 23 वर्षीय लोव्हलिनाने चांगला खेळ करत भारताचे पदक निश्चित केले.