South Africa vs India, 2nd T20I Match at Gqeberha, Weather Update:

भारतीय क्रिकेट संघ सध्या दक्षिण आफ्रिका दौऱ्यावर आहे. या दौऱ्यातील टी20 मालिकेला 10 डिसेंबर रोजी सुरुवात झाली. या मालिकेतील दुसरा सामना गेकेबेरा (पूर्वीचे नाव पोर्ट एलिझाबेथ) येथे खेळवला जाणार आहे. हा सामना मंगळवारी (12 डिसेंबर) होणार असून भारतीय प्रमाणवेळेनुसार रात्री 8.30 वाजता सुरु होणार आहे.

दरम्यान, दक्षिण आफ्रिका आणि भारत यांच्यात होत असलेल्या टी20 मालिकेतील पहिला सामना डर्बनला 10 डिसेंबरला होणार होता, पण हा सामना पावसामुळे रद्द करण्यात आला. त्यामुळे आता दुसऱ्या सामन्यातही पाऊस अडथळा बनणार का, असा प्रश्न चाहत्यांना पडला आहे.

मंगळवारी गेकेबेरामध्येही ढगाळ वातावरण असणार आहे. तसेच पाऊसही असणार आहे. Accuweather च्या अंदाजानुसार मंगळवारी गेकेबेरामधील हवामान पूर्ण ढगाळ असेल, त्याचबरोबर दिवसा 80 टक्क्यांपेक्षा अधिक पावसाची शक्यता आहे.

मात्र, रात्री पावसाची शक्यता 6 टक्केच आहे. त्यामुळे दुसरा टी20 सामना खेळवला जाऊ शकतो. पण तरी दिवसा पाऊस झाला असल्याने कदाचीत मैदान ओले होऊ शकते आणि त्याचमुळे सामन्याला उशीर होऊ शकतो. किंवा सामन्यादरम्यानही पावसामुळे काहीसा अडथळा निर्माण होऊ शकतो.

लाईव्ह स्ट्रिमिंग

दक्षिण आफ्रिका विरुद्ध भारत यांच्यातील दुसरा टी20 सामन्याचे थेट प्रक्षेपण स्टार स्पोर्ट्सच्या चॅनेलवर, तसेच डिज्नी प्लस हॉटस्टारवर होणार आहे.

युवा भारतीय संघ

टी20 मालिकेसाठी भारताच्या संघात अनेक युवा खेळाडू आहेत. विराट कोहली, रोहित शर्मा, जसप्रीत बुमराह यांसारख्या अनेक वरिष्ठ खेळाडूंना या मालिकेसाठी विश्रांती देण्यात आली आहे.

तसेच हार्दिक पंड्या आणि मोहम्मद शमीही दुखापतीमुळे संघातून बाहेर आहेत. त्यामुळे दक्षिण आफ्रिकेविरुद्ध टी20 मालिकेत भारतीय संघाचे नेतृत्व सूर्यकुमार यादव करत आहे. तसेच उपकर्णधारपद रविंद्र जडेजा सांभाळत आहे.

असे आहेत संघ -

• भारत - यशस्वी जयस्वाल, शुभमन गिल, ऋतुराज गायकवाड, तिलक वर्मा, सूर्यकुमार यादव (कर्णधार), रिंकू सिंह, श्रेयस अय्यर, ईशान किशन (यष्टीरक्षक), जितेश शर्मा (यष्टीरक्षक), रवींद्र जडेजा (उपकर्णधार), वॉशिंग्टन सुंदर, रवी बिश्नोई, कुलदीप यादव, अर्शदीप सिंग, मोहम्मद सिराज, मुकेश कुमार आणि दीपक चहर.

• दक्षिण आफ्रिका - एडन मार्करम (कर्णधार), ओटनियल बार्टमन, मॅथ्यू ब्रिट्झके, नांद्रे बर्गर, गेराल्ड कोएत्झी (पहिला आणि दुसरा टी20), डोनोव्हन फरेरा, रिझा हेन्ड्रिक्स, मार्को यान्सिन (पहिला आणि दुसरा टी20), हेन्रिक क्लासेन, केशव महाराज, डेव्हिड मिलर, लुंगी एन्गिडी (पहिला आणि दुसरा टी20), अँडिले फेहलुकवायो, ताब्राईज शम्सी, ट्रिस्टन स्टब्स आणि लिझार्ड विल्यम्स.