पणजी : कुचबिहार करंडक 19 वर्षांखालील क्रिकेट (Cricket) स्पर्धेत डावाने पराभूत होण्याची गोव्याची सवय सलग तिसऱ्या लढतीत कायम राहिली. हिमाचलने त्यांना गुरुवारी सकाळी डाव व 114 धावांच्या फरकाने हरवून सात गुणांची कमी केली. एलिट क गट चार दिवसीय सामना सूरत येथील खोलवड जिमखाना मैदानावर झाला.

गोव्याच्या (goa) संघाची 419 धावांच्या पिछाडीनंतर सामन्याच्या तिसऱ्या दिवसअखेर 8 बाद 292 अशी स्थिती होती. गुरुवारी सकाळी 7.2 षटकांत 13 धावांची भर टाकून गोव्याचा दुसरा डाव 305 धावांत संपुष्टात आला. दीप कसवणकर 15, तर लखमेश पावणे 4 धावांवर बाद झाला.

हिमाचलच्या रितिक कुमार याने दुसऱ्या डावात 136 धावांत 8 गडी बाद केले. पहिल्या डावात त्याने 54 धावांत 6 बळी घेतले होते. एकूण 14 गडी बाद करणारा रितिक हिमाचलच्या स्पर्धेतील पहिल्या विजयाचा शिल्पकार ठरला. गोव्याने पहिल्या डावात 153 धावा केल्यानंतर हिमाचलने पहिला डाव 7 बाद 572 धावांवर घोषित केला होता.

गोव्याला स्पर्धेतील पहिल्या सामन्यात महाराष्ट्राकडून दोन दिवसांत डाव व 64 धावांनी हार स्वीकारावी लागली होती. नंतर तमिळनाडूने त्यांच्यावर डाव व 49 धावांनी विजय नोंदविला. सलग तीन सामन्यांत मोठ्या फरकाने पराभूत झालेला गोव्याचा संघ गटात शून्य गुणासह शेवटच्या क्रमांकावर आहे. त्यांचा पुढील सामना 20 डिसेंबरपासून छत्तीसगडविरुद्ध सूरत येथे खेळला जाईल.