WPL 2023: महिला प्रीमियर लीग (WPL) च्या लीग टप्प्यातील शेवटच्या सामन्यात दिल्ली कॅपिटल्सने यूपी वॉरियर्सचा पाच गडी राखून पराभव केला. या सामन्यात दिल्लीने नाणेफेक जिंकून प्रथम गोलंदाजी करण्याचा निर्णय घेतला होता.

दिल्लीच्या गोलंदाजांनी यूपीला मोठी धावसंख्या करु दिली नाही आणि पूर्ण 20 षटके खेळल्यानंतर हा संघ सहा विकेट गमावून केवळ 138 धावा करु शकला.

यानंतर दिल्लीने आपल्या शानदार फलंदाजीच्या जोरावर 17.5 षटकांत पाच विकेट्स गमावून लक्ष्य गाठले. विशेष म्हणजे, दिल्लीने हा सामना जिंकून थेट फायनलसाठी क्वालिफाय केले आहे.

लॅनिंग-शफालीची शानदार खेळी

दिल्लीला विजयासाठी 139 धावा करायच्या होत्या. दिल्लीला चांगली सुरुवात हवी होती, जी त्यांना मिळाली. मेग लॅनिंग आणि शफाली वर्मा (Shafali Verma) यांनी दिल्लीला चांगली सुरुवात करुन दिली. दोघींनी पहिल्या विकेटसाठी 56 धावांची भागीदारी केली.

शफाली 16 चेंडूत 4 चौकारांच्या मदतीने 21 धावा करुन बाद झाली. यानंतर जेमिमा रॉड्रिग्ज (3 धावा) एकूण 67 धावांवर पॅव्हेलियनमध्ये परतली. यानंतर लॅनिंगही एकूण 70 धावांवर बाद झाली. तिने 23 चेंडूंत पाच चौकार आणि दोन षटकारांच्या मदतीने 39 धावा केल्या.

अशी यूपीची फलंदाजी होती

कर्णधार अॅलिसा हिली आणि श्वेता सेहरावत यांनी यूपीला चांगली सुरुवात देण्याचा प्रयत्न केला. या दोघींनी पहिल्या विकेटसाठी 30 धावा काढल्या.

श्वेता 19 धावा करुन बाद झाली. परंतु हिलीने आपली शानदार खेळी सुरुच ठेवली आणि धावा काढत राहिली. तिने 34 चेंडूंत चार चौकार आणि एका षटकाराच्या मदतीने 36 धावा केल्या. 63 धावांवर तिची विकेट पडली.

यानंतर, सिमरन शेख केवळ 11 धावा करुन बाद झाली पण तालिया मॅकग्राने आघाडी घेत वेगवान धावा केल्या. तिने शानदार अर्धशतक झळकावले आणि त्यामुळेच यूपीचा संघ आपेक्षित धावसंख्या गाठू शकला.

मॅकग्राने 32 चेंडूंचा सामना करत आठ चौकार आणि दोन षटकारांच्या मदतीने 58 धावा केल्या. तिला शेवटच्या फळीत इतर कोणतीही फलंदाज साथ देऊ शकली नाही.

तसेच, किरण नवगिरे दोन, दीप्ती शर्मा तीन, सोफी एक्लेस्टोन खाते न उघडता आऊट झाली. मॅकग्रा नाबाद राहिली. दिल्ली कॅपिटल्सकडून (Delhi Capitals) एलिसा कॅप्सीने तीन बळी घेतले. राधा यादवने दोन गडी बाद केले. त्याचबरोबर, जेस जोनासेनला एक विकेट मिळाली.