Sanju Samson: भारतीय दिग्गज खेळाडूने 'संजू सॅमसन'बाबत केले मोठे वक्तव्य! म्हणाला, " त्याच्याकडून निराशा झाली, संघातून काढण्यात आले.."

नवी दिल्ली : केरळचा अनुभवी फलंदाज संजू सॅमसन याने वेस्ट इंडीज, इंग्लंड व न्यूझीलंड या देशांविरुद्धच्या सलग तीन सामन्यांमध्ये अनुक्रमे नाबाद ९७ धावा, ८९ धावा, ८९ धावा फटकावत भारतीय संघाच्या टी-२० विश्‍वकरंडक विजेतेपदात मोलाचा वाटा उचलला.

टी-२० विश्‍वकरंकाआधी न्यूझीलंडविरुद्धच्या मालिकेत सपाटून अपयश आल्यानंतर टीम इंडियातून बाहेर काढण्यात आलेल्या या पठ्ठ्याने मालिकावीराचा मान संपादत झोकात पुनरागमन केले. संजू सॅमसनच्या धडाकेबाज कामगिरीबाबत भारताचे महान फलंदाज सुनील गावसकर यांनी कौतुक केले.

सुनील गावसकर यांनी संजू सॅमसनच्या प्रवासाबद्दल सांगताना म्हटले की, न्यूझीलंडविरुद्धच्या मालिकेत त्याच्याकडून निराशा झाली. संजू सॅमसनला संघातून काढून टाकण्यात आले. टी-२० विश्‍वकरंडकात त्याला नामिबियाविरुद्धच्या लढतीत खेळण्याची संधी मिळाली.

या लढतीत त्याला ठसा उमटवता आला नाही. यानंतर सुपर-८ फेरीतील झिम्बाब्वेविरुद्धच्या लढतीत त्याला संधी मिळाली, पण त्याने वेस्ट इंडीजविरुद्धच्या लढतीत नाबाद ९७ धावांची खेळी केली आणि येथून कलाटणी मिळाली.