Asia Cup 2023, India vs Pakistan, probable date and place: आशिया चषक 2023 स्पर्धेच्या आयोजनाबाबत गेल्या अनेक महिन्यांपासून चर्चा आहे. ही स्पर्धा पाकिस्तान आणि श्रीलंकेत होणार आहे. पण असे असले तरी अद्याप या स्पर्धेचे वेळापत्रक जाहीर झाले नाही.

मात्र, आता असे समोर येत आहे की आशियाई क्रिकेट परिषदेकडून (ACC) अंतिम वेळापत्रक तयार करण्यात आले असून 19 जुलैला संध्याकाळी वेळापत्रक जाहीर करण्यात येणार आहे.

तसेच इएसपीएन क्रिकइन्फोने दिलेल्या माहितीनुसार 30 ऑगस्ट रोजी आशिया चषकाला सुरुवात होणार आहे. यापूर्वी 31 ऑगस्टला ही स्पर्धा सुरू होईल, असे एसीसीने सांगितले होते. पण आता ही स्पर्धा एक दिवस आधी सुरुवात होईल. पहिला सामना पाकिस्तान विरुद्ध नेपाळ यांच्यात मुलतानला खेळवला जाऊ शकतो. अंतिम सामना कोलंबोला 17 सप्टेंबरला खेळवला जाणार आहे.

तसेच भारत आणि पाकिस्तान यांच्यातील सामना 2 सप्टेंबर रोजी श्रीलंकेतील कँडी येथे खेळवला जाऊ शकतो. तसेच जर सुपर फोरमध्येही भारत आणि पाकिस्तान आमने-सामने आले, तर 10 सप्टेंबर रोजी कँडीमध्येच हा सामना होईल.

हे आशिया चषकाचे 16 वे पर्व आहे. या 16 व्या पर्वात होणाऱ्या एकूण 13 सामन्यांपैकी 4 सामने पाकिस्तानमध्ये खेळवले जाणार आहेत. तसेच अन्य 9 सामने श्रीलंकेत खेळवले जाणार आहेत.

पाकिस्तानमध्ये पहिल्या सामन्याव्यतिरिक्त 3 सप्टेंबर रोजी लाहोरला बांगलादेश विरुद्ध अफगाणिस्तान, 5 सप्टेंबर रोजी श्रीलंका विरुद्ध अफगाणिस्तान संघात सामना होईल. तसेच सुपर फोर फेरीतील एक सामनाही पाकिस्तानला होईल.

सहा संघात रंगणार स्पर्धा

आशिया चषक 2023 स्पर्धेत भारत, पाकिस्तान, श्रीलंका, बांगलादेश, अफगाणिस्तान आणि नेपाळ हे सहा संघ सहभागी होणार आहेत. या सहा संघांची सुपर सिक्स फेरीसाठी दोन गटात विभागणी करण्यात आली आहे.

एका गटात भारत, पाकिस्तान आणि नेपाळ संघांचा समावेश आहे, तर दुसऱ्या गटात श्रीलंका, बांगलादेश आणि अफगाणिस्तान या संघांचा समावेश आहे.

सुपर सिक्स फेरीनंतर प्रत्येक गटातील अव्वल दोन संघ सुपर फोर फेरीत प्रवेश करतील. सुपर फोर फेरीत चार संघात साखळी फेरी खेळवली जाईल, यातून अव्वल दोन संघ 17 सप्टेंबर दरम्यान अंतिम सामना खेळणार आहेत.