विराट कोहलीने कर्णधारपद सोडल्यानंतर त्याच्या चाहत्यांच्या प्रतिक्रिया सातत्याने समोर येत आहेत. क्रिकेटमधील दिग्गजांपासून ते बॉलीवूड सेलिब्रिटींपर्यंत सर्वांनी कोहलीला कर्णधार म्हणून उत्तम कारकीर्दीसाठी शुभेच्छा दिल्या आहेत. दरम्यान आता विराटची पत्नी अनुष्का शर्माने (Anushka Sharma) देखील आता एक भावनिक पोस्ट शेअर केली आहे, ज्यामध्ये तिने विराटच्या कर्णधार झाल्यापासून ते आतापर्यंतच्या सर्व आठवणी शेअर केल्या आहेत. या लांबलचक पोस्टसोबत अनुष्काने विराटचा (Virat Kohli) एक फोटोही शेअर केला आहे, ज्यामध्ये विराटने भारताची टेस्ट जर्सी घातली असून मनमोकळेपणाने हसताना दिसत आहे.

विराटप्रमाणेच अनुष्कानेही तिच्या पोस्टमध्ये धोनीचा उल्लेख केला आहे. मात्र, याशिवाय अनुष्काने इतर कोणत्याही खेळाडूबद्दल लिहिलेले नाही. 'या सात वर्षांचे धडे आमची मुलगी तिच्या वडिलांमध्ये बघेल.'

अनुष्काने तिच्या पोस्टमध्ये लिहिले की, “मला 2014 सालातील तो दिवस आठवतो जेव्हा तू मला सांगितले होते की, तुला कर्णधार बनवण्यात आले आहे, कारण धोनीने कसोटी क्रिकेटमधून निवृत्ती घेण्याचा निर्णय घेतला.

''मला आठवतंय त्या दिवशी धोनी आपल्याबरोबर बोलत असताना गमतीने म्हणाला होता की बघा किती लवकर तुमची दाढी पांढरी व्हायला लागेल. त्या दिवशी आपण सगळे खूप हसलो होतो."

"त्या दिवसापासून, मी तुझी दाढी राखाडी होण्यापर्यंत पाहिले. मी वाढही पाहिली आहे. आणि हो, भारतीय क्रिकेट संघाचा कर्णधार म्हणून तुझ्या प्रगतीचा आणि नेतृत्वाचा मला खूप अभिमान आहे. परंतु तु स्वतःमध्ये जी प्रगती केली त्याचा मला अधिक अभिमान आहे."