पणजी: नवनिर्वाचित जिल्‍हा पंचायत सदस्‍यांना आपापल्‍या मतदारसंघांचा विकास साधण्‍यासाठी विविध प्रकारचे अधिकार देण्‍यात येणार असल्‍याची घोषणा मुख्‍यमंत्री डॉ. प्रमोद सावंत यांनी काहीच दिवसांपूर्वी केलेली होती. त्‍यानंतर आता सामाजिक विकासाला अधिकाधिक गती देण्‍यासाठी जिल्हा पंचायत सदस्‍यांच्‍या खांद्यावर पुढील काळात काही जबाबदाऱ्या देण्‍यात येणार असून, लवकरच त्‍याबाबतची घोषणा केली जाईल, असे पंचायतमंत्री माविन गुदिन्‍हो यांनी गुरुवारी स्‍पष्‍ट केले.

नवनिर्वाचित जिल्‍हा पंचायत सदस्‍यांसाठी ‘जीपार्ड’तर्फे पणजीत आयोजित प्रशिक्षण शिबिराच्या समारंभावेळी ते बोलत होते. पंचायत संचालक महादेव आरोंदेकर, जीपार्डचे संचालक वासुदेव शेट्ये आदी यावेळी उपस्‍थित होते. जिल्‍हा पंचायत सदस्‍यांनी आपापल्‍या मतदारसंघांचा विविध क्षेत्रांत विकास घडवून आणून राज्‍याचा सर्वांगीण विकास साधण्‍यात योगदान देणे आवश्‍‍यक आहे.

कोणताही भेदभाव न करता त्‍यांनी विकासाची गंगा समाजातील शेवटच्‍या माणसापर्यंत पोहोचवली पाहिजे. यासाठीचे प्रशिक्षण देण्‍यासाठीच ‘जीपार्ड’ने या प्रशिक्षण शिबिराचे आयोजन केले असून, त्‍याचा फायदा सर्वच सदस्‍यांना होईल. या शिबिरामुळे आपल्‍या जबाबदाऱ्या आणि कर्तव्‍यांची माहिती त्‍यांना मिळेल, असा विश्‍‍वास मंत्री गुदिन्‍हो यांनी व्‍यक्त केला.

निधी विनावापर पडू देऊ नका!

जिल्‍हा पंचायत मतदारसंघांच्‍या विकासासाठी केंद्र, राज्‍य सरकारसह वित्त आयोगाकडूनही निधी देण्‍यात येतो. परंतु, त्‍या निधीतील पैसा विनावापर पडून असल्‍याचे वारंवार दिसून येत आहे. त्‍यामुळे जिल्‍हा पंचायत सदस्‍यांनी आपापल्‍या मतदारसंघांतील जनतेसाठी आवश्‍‍यक असलेले प्रकल्‍प, साधनसुविधा उभारून हा निधी खर्च करावा, असे आवाहनही मंत्री माविन गुदिन्‍हो यांनी केले.