Accident Death: पणजी येथे गेल्या काही दिवसांपासून राज्यात बुडून मरण पावणाऱ्यांची संख्‍या दिवसेंदिवस वाढत चालली आहे. काल रविवारी संध्‍याकाळी चिंबल येथे अशीच एक दुर्घटना घडली. मुंबईतून गोव्यात आपल्या नातेवाईकांकडे आलेला डॅरिक राज (१८) हा युवक शिनेर-चिंबल येथील चिरेखाणीत बुडाला.

आज सकाळी त्याचा मृतदेह आढळला. मिळालेल्‍या माहितीनुसार, डॅरिक राज हा दिवाळीनिमित्त चिंबल येथील आपल्या नातेवाईकांकडे आला होता. काल संध्याकाळी तो आपला चुलत भाऊ व इतर मित्रांसमवेत शिनेर-चिंबल येथील चिरेखाणीतील पाण्यात पोहण्यासाठी गेला होता. सर्वजण पाण्यात उतरले, पण डॅरिकला पाण्याचा अंदाज न आल्‍याने तो गटांगळ्या खाऊ लागला. त्याला वाचवण्यासाठी त्याच्या मित्रांनी प्रयत्न करण्यापूर्वीच तो पाण्यात बुडाला.

घटनेची माहिती मिळताच जुने गोवे अग्निशमन दलाचे जवान व पोलिसांनी घटनास्थळी धाव घेतली. रात्री उशिरापर्यंत शोध घेतला, मात्र त्‍याचा थांगपत्ता लागला नव्‍हता. आज सकाळी खासगी डायव्हर्सना पाचारण करण्यात आले. त्‍यांनी काही मिनिटांतच डॅरिकचा मृतदेह पाण्‍याबाहेर काढला, अशी माहिती पोलिस निरीक्षक सतीश पडवळकर यांनी दिली. चिरेखाणीच्‍या मालकाचीही चौकशी करण्‍यात येणार आहे, असेही ते म्‍हणाले. पुढील तपास उपनिरीक्षक सुदिन रेडकर करत आहेत.