Accident Death: दोन अपघातांत दोन दुचाकीस्‍वार ठार

Accident Death: अलीकडच्‍या काळात राज्यात दरदिवशी रस्‍तेअपघातांत बळी जाण्‍याचे प्रमाण वाढले आहे. गेल्‍या 24 तासांत बांबोळी व वास्को येथे झालेल्‍या दोन वेगवेगळ्‍या अपघातांत दोघा दुचाकीस्वारांचा मृत्यू झाला. पर्वरीत वृत्तपत्र विक्रीचा व्यवसाय असलेले श्रीपाद मोरजकर (54) हे काल रात्री उशिरा बांबोळी येथून पर्वरीकडे घरी परतत होते.

बांबोळी येथे ‘नियाझ’ रेस्टॉरंटजवळ पोहोचले असता भरधाव वेगात असलेल्या मोरजकर यांचा दुचाकीवरील ताबा सुटला व ते रस्त्यावर आपटले. त्यांच्या डोक्याला गंभीर दुखापत होऊन रक्तस्राव झाला. त्यांना त्वरित गोमेकॉ इस्पितळात दाखल करण्‍यात आले, परंतु उपचार सुरू असतानाच आज पहाटे चारच्या सुमारास त्यांची प्राणज्‍योत मालवली. उत्तरीय तपासणीनंतर

मृतदेह कुटुंबीयांच्या ताब्यात देण्यात आला.

दुसरा अपघात वास्कोतील एफ. एल. गोम्स मार्गावरील शिवम सिनेथिएटरजवळ काल रात्री घडला. त्‍यात बेलाबाय येथील समीर गोसावी (५२) यांचा मृत्यू झाला. दुचाकीवरून रस्‍त्‍यावर पडल्‍यामुळे त्‍यांच्‍याही डोक्‍याला गंभीर दुखापत झाली. तातडीने त्यांना १०८ रुग्णवाहिकेतून चिखली उपजिल्हा इस्पितळात नेण्‍यात आले, परंतु डॉक्टरांनी त्यांना मृत घोषित केले. ते एका पायाने अपंग होते, त्यामुळे तीनचाकी वाहन चालवायचे. त्यांचा बेलाबाय येथे रस-आम्लेट व इतर खाद्यपदार्थाचा गाडा आहे.