Aarti Competition : सरकारी माध्यमिक विद्यालय किर्लावाडा चिंबल व परशुराम मेमोरियल सरकारी माध्यमिक विद्यालय मेरशे यांच्या संयुक्त विद्यमाने स्वामी समर्थ मंदिर सभागृहात तिसवाडी तालुक्यातील शालेय मुलांसाठी गणेश चतुर्थीनिमित्त आरती गायन स्पर्धेचे आयोजन करण्यात आले होते. आरती गायनात एकूण 14 गट सहभागी झाले होते. या स्पर्धेत मुष्टीफंड हायस्कूल कुजिरा यांनी प्रथम पारितोषिक पटकावले.

या स्पर्धेत श्री दयानंद आर्या हायस्कूल नेवरा यांना द्वितीय, सेंट अलॉयसियस हायस्कूल दिवाडी यांना तृतीय पारितोषिक प्राप्त झाले. उत्कृष्ट गजरचे पारितोषिक श्री सरस्वती हायस्कूल जुवे, तिसवाडी गोवा यांना तर मडकईकर नवचैतन्य हायस्कूल कोर्ली तिसवाडी गोवा यांना द्वितीय उत्तेजनार्थ तर प्रथम बालभारती विद्या मंदिर रायबंदर यांना प्रथम उत्तेजनार्थ बक्षीस प्राप्त झाले. या स्पर्धेला तिसवाडी तालुक्यातील शाळांनी उत्स्फूर्त प्रतिसाद दाखविला.

या आरती गायन स्पर्धेच्या कार्यक्रमाचे उद्‍घाटन प्रमुख पाहुणे पालिका प्रशासन संचालक गुरुदास पिळर्णकर यांनी केले. यावेळी सम्माननीय अतिथी जिल्हा शिक्षणाधिकारी कविता नाईक गावकर, शाळेचे मुख्याध्यापक विशाल शिंगणापूरकर, स्पर्धा परीक्षक दुर्गाकुमार नावती व शंभू पिळर्णकर आदी मान्यवर उपस्थित होते. शिक्षिका साक्षी पंडित व अनुपा भगत यांनी मान्यवरांचा परिचय करून दिला. सूत्रसंचालन शिक्षिका श्वेता पवार व शिक्षिका उषा पुनाजी यांनी केले. शिक्षिका ज्योती अनिल नाईक यांनी कार्यक्रमाची सविस्तर माहिती दिली. शिक्षिका सुरेखा देसाई यांनी विजेत्यांची नावे जाहीर केली. विद्या पिळर्णकर व दीपा लवंदे यांनी आभार मानले.