पणजी : दोन महिन्यापूर्वी हॉटमिक्सिंग केलेल्या पणजी आणि ताळगावातील रस्त्यावरील हॉटमिक्सिंग मॉन्सूनच्या पहिल्या महिन्यातच वाहून जाण्याचा धक्कादायक प्रकार घडला आहे. या प्रकरणाची दक्षता खात्यामार्फत चौकशी करण्याची मागणी महसूल मंत्री बाबूश मोन्सेरात यांनी केली आहे.

मोन्‍सेरात यांनी यासंदर्भात मुख्यमंत्री डॉ.प्रमोद सावंत यांना पत्र लिहिले आहे. निकृष्ट दर्जाचे काम केलेल्या कंत्राटदारावर कारवाई झालीच पाहिजे. परंतु, काम योग्य दर्जाचे झाले असल्याची मान्यता देणाऱ्या अभियंत्यावर सुद्धा कारवाई होण्याची आवश्‍यकता आहे, असे मोन्सेरात यांनी स्पष्ट केले. पर्वरी येथील मंत्रालयात ते पत्रकारांशी बोलत होते.

हे प्रकरण गंभीर आहे, कारण केवळ एक किंवा दोन रस्त्यांवरील हॉटमिक्सिंग वाहून गेले नाही. तर, पणजी आणि ताळगाव परिसरातील प्रत्येक रस्त्याचे हेच हाल झाले आहेत. प्रचंड खर्च करून हे हॉटमिक्सिंग केले जाते.

त्यासाठी कित्येक वर्षांसाठी हॉटमिक्सिंग केलेला रस्ता टिकला पाहिजे. परंतु, येथे पाऊस सुरू झाल्यापासून हॉटमिक्सिंग चक्क वाहून गेले आहे. त्यासाठी चौकशी झाली पाहिजे, असे मत मोन्सेरात यांनी व्यक्त केले.