मोरजी: सतत सुरू असलेल्या मुसळधार पावसामुळे उगवे परिसरात डोंगराचा काही भाग अचानक कोसळण्याची घटना घडली. सुदैवाने या घटनेत कोणतीही जीवितहानी झाली नसली, तरी परिसरातील नागरिकांमध्ये भीतीचे वातावरण निर्माण झाले आहे.

गेल्या आठवडाभरात या परिसरात घडलेली ही तिसरी गंभीर घटना असून, यापूर्वी रस्त्यावर मोठे दगड कोसळणे तसेच झाडे उन्मळून पडण्याच्या घटना घडल्या होत्या. आता दरड कोसळल्याने या परिसरातील सुरक्षिततेचा प्रश्न ऐरणीवर आला आहे.

स्थानिक नागरिकांनी प्रशासनाकडे वारंवार लक्ष वेधूनही अद्याप कायमस्वरूपी उपाययोजना करण्यात आलेली नाही. पावसाचा जोर कायम असल्याने भविष्यात आणखी मोठी दुर्घटना घडण्याची शक्यता स्थानिकांनी व्यक्त केली आहे.

उपाययोजनांची मागणी

स्थानिक ग्रामस्थांनी सार्वजनिक बांधकाम खाते, आपत्ती व्यवस्थापन विभाग आणि जिल्हा प्रशासनाने घटनास्थळी त्वरित पाहणी करून दरडप्रवण भागाची तपासणी करावी, आवश्यक ठिकाणी संरक्षक भिंती उभाराव्यात, सैल दगड हटवावेत तसेच नागरिकांच्या सुरक्षिततेसाठी कायमस्वरूपी उपाययोजना कराव्यात, अशी जोरदार मागणी केली आहे.