सासष्टी: दक्षिण गोव्यात अनेक सार्वजनिक ठिकाणी रस्त्यांवर टाकून दिलेली असंख्य वाहने आहेत. ती हटविण्यासाठी सरकारतर्फे काहीच उपाययोजना केली जात नसल्याबद्दल नाराजी व्यक्त होत आहे.

कित्येक वर्षांपासून एकाच ठिकाणी असलेल्या या वाहनांमुळे अनेक प्रश्न उपस्थित होऊ शकतात, त्यात आरोग्याचा प्रमुख प्रश्न आहे. त्यामुळे ही वाहने हटवण्याची तसेच त्यांची योग्य विल्हेवाट लावण्यासाठीच्या मागणीला जोर आला आहे.

गोवा कॅनच्या लॉर्ना फर्नांडिस यांनी सांगितले की, आम्ही या टाकून दिलेल्या वाहनांचा प्रश्न दक्षिण गोवा रस्ता सुरक्षा बैठकीत उपस्थित केला होता, पण प्रशासनाकडून आम्हाला ठोस उत्तर मिळालेले नाही, असे त्यांनी सांगितले.

सरकारतर्फे एक अधिसूचना जारी करण्यात आली होती. त्याप्रमाणे जिल्हाधिकारी व पोलिस एकत्र येऊन पंचायत व नगरपालिकांशी संपर्क साधून टाकून दिलेल्या वाहनांची माहिती गोळा करणार, एक अहवाल तयार करणार व नंतर ती हटविण्यासाठी किंवा विल्हेवाट लावण्यासाठी प्रक्रिया सुरू करणार.

पण प्रत्यक्षात नेमकी ही प्रक्रिया कुठे पोहोचली याबद्दल काहीच माहिती देण्यात आली नाही, असे फर्नांडिस यांनी सांगितले. मडगाव शहर भागातही अनेक वाहने बेवासर पडून आहेत.

मडगाव पोलिस स्थानकाच्या मागे वाहनांचा खच

मडगावमधील समाजसेवक व माजी नगरसेवक जाफर बुधानी यांनी सांगितले की, पोलिस स्थानकाच्या मागे असलेल्या पोलिस क्वार्टर्स परिसरात असंख्य वाहने टाकून देण्यात आली आहेत. ही वाहने पोलिसांनी जप्त केली आहेत. पण पोलिसांनी त्याबद्दल काहीच निर्णय घेतला नसल्याचे कळते.

ही सर्व वाहने जप्त केली आहेत व काही वाहनांबद्दल न्यायालयात खटले चालू आहेत. तरीसुद्धा अशी वर्षानुवर्षे वाहने टाकून देणे या क्वार्टर्समध्ये राहणाऱ्यांच्या आरोग्याला सुद्धा धोका उद्भवू शकतो. पोलिस अधिकाऱ्यांनी याकडे लक्ष देणे आवश्यक आहे, असे त्यांचे मत आहे. पाऊस जवळ येऊन ठेपला आहे; तत्पूर्वी हा परिसर स्वच्छ होणे आवश्यक असल्याचे त्यांनी स्पष्ट केले.