पणजी : गोव्यात मुख्यमंत्री डॉ. प्रमोद सावंत यांनी सोमवारी पद आणि गोपनीयतेची शपथ घेतली. प्रमोद सावंत यांच्यासोबत इतर 8 मंत्र्यांचा शपथविधीही पार पडला आहे. राज्यपाल पी एस श्रीधरन पिल्लई यांनी सर्व मंत्र्यांना शपथ दिली. मात्र या मंत्रिमंडळात सासष्टी तालुक्याला प्रतिनिधीत्वच दिलं नसल्याने नाराजी व्यक्त करण्यात येत आहे.

सासष्टी तालुक्यात आठ मतदारसंघ येतात. मात्र पहिल्यांदाच सासष्टी तालुक्याला राज्याच्या मंत्रिमंडळात स्थान मिळालेलं नाही, दुसरीकडे फोंडा तालुक्याला मात्र सर्वाधिक 3 मंत्रिपदं मिळाली आहेत. सासष्टी हा नेहमीच काँग्रेसचा (Congress) बालेकिल्ला राहिलेला आहे. मात्र गेल्या काही काळापासून सासष्टीत काँग्रेसचं वर्चस्व कमी होताना दिसत आहे. गोवा हे छोटं राज्य असल्याने आठ मतदारसंघ येणाऱ्या सासष्टी तालुक्याला प्रत्येक सरकारमध्ये स्थान मिळतंच. मात्र यावेळी सासष्टीवर अन्याय झाल्याची भावना स्थानिक पातळीवर व्यक्त होताना दिसत आहे.

आतापर्यंत सासष्टी तालुक्याने गोव्याला चार मुख्यमंत्री दिले आहेत, जे कोणत्याही अन्य तालुक्यापेक्षा जास्त आहेत. मात्र यावेळी सासष्टीत वेगळं चित्र पाहायला मिळत आहे. भाजपने नावेलीत जागा जिंकत इतिहास रचला खरा, मात्र उल्हास तुयेकरांनाही मंत्रिमंडळात स्थान न मिळाल्याने सासष्टी तालुका सरकारमधील सहभागापासून वंचित राहिल्याचं चित्र आहे. कुडतरीचे अपक्ष आमदार आलेक्स रेजिनाल्ड यांना मंत्रिमंडळात स्थान मिळणार असल्याची चर्चा होती. मात्र सोमवारी झालेल्या शपथविधीत त्यांना स्थान मिळालं नाही. आता त्यांच्या मंत्रिपदाचं भवितव्य हे पुढील मंत्रिमंडळ विस्तारावर ठरणार आहे.

गोव्यात 2007 साली सासष्टी तालुक्याला सर्वाधिक 6 मंत्रिपदं मिळाली होती. दिगंबर कामत (Digambar Kamat) मुख्यमंत्री असताना सासष्टी तालुक्याला सरकारमध्ये प्रतिनिधीत्वाची संधी मिळाली होती. यानंतर 2012 साली भाजपला बहुमत मिळालेलं असतानाही नावेलीचे अपक्ष आमदार आवेर्तानो फुर्तादो यांना कॅबिनेटमध्ये संधी देण्यात आली होती. 2017 साली भाजपचं संख्याबळ 13 वर आलं आणि सहा तालुक्यात भाजपला (BJP) एकही जागा जिंकता आली नव्हती. मात्र तरीही भाजपने प्रादेशिक पक्षांच्या साथीने आणि अपक्ष आमदारांच्या पाठिंब्याने सरकार स्थापन केलं ज्यात सासष्टीला सरकारमध्ये स्थान मिळालं. सावंत सरकारमध्ये पेडणे, सांगे, आणि धारबांदोडा तालुक्यांनाही प्रतिनिधीत्व मिळालेलं नाही, ज्याठिकाणी भाजपच्या जागा आलेल्या आहेत.