Waste fee at Tambadi Surla

तांबडीसुर्ला: साकोर्डा पंचायतीच्या महसुलात वाढीसाठी येत्या एप्रिलपासून तांबडीसुर्ल येथील पर्यटन स्थळाला भेट देणाऱ्या पर्यटकांच्या वाहनाला कचरा शुल्क आकारले जाणार असून त्यासाठी सर्व सोपस्कार पूर्ण झाल्यावर अंतिम निर्णय घेण्यात येतील, अशी माहिती उपसरपंच शिरीष देसाई यांनी सभेत दिली.

सचिव संदीप हल्यालर यांनी गतवर्षांचे १ कोटी ६९ लाख ९४ हजार रुपयाचे अंदाजपत्रक सभेत सादर केले. सभेतील उपस्थित सभासदानी अंदाजपत्रकास मान्यता दिली.या अंदाजपत्रकात अनेक सार्वजनिक कामासाठी ८५ लाख ३० हजारांची तरतूद केली असून पथदीप खरेदी करणे, पथदीपांची दुरुस्ती आणि विस्तार करणे, संकीर्ण या कामांचा त्यात समावेश करण्यात आला आहे.

तसेच सार्वजनिक स्वच्छता, स्वास्थ्यासाठी १० लाख ५ हजार रुपये तरतूद केली आहे.गटारांची देखभाल करणे, कचऱ्यांची विल्हेवाट लावणे, मृतदेहाची विल्हेवाट लावणे, सार्वजनिक स्थळांची साफसफाई करणे, वैद्यकीय शिबिर, नवीन गटारांची बांधणी करणे, संकीर्ण या कामांची यादी निश्चित करण्यात आली आहे.

उपसरपंच शिरीष देसाई यांच्या अध्यक्षतेखाली ही ग्रामसभा पंचायतीच्या सभागृहात घेण्यात आली.पंचसदस्य संजना नार्वेकर, महादेव शेटकर, जितेंद्र कालेकर,निरीक्षक आरती गावस यांची व्यासपीठावर उपस्थिती होती. सभेला सात पैकी तीन पंचसदस्य अनुपस्थित होते. शिरीष देसाई यांनी स्वागत केले.जितेंद्र कालेकर यांनी आभार मानले.