फोंडा: गेल्या रविवारी तहकूब झालेली साकोर्डा ग्रामसभा आज पुन्हा गोंधळाच्या वातावरणात पार पडली. निधीत अफरातफर झालेल्या आरोपावर सचिव संदिप हल्ल्याळे यांच्यावर प्रश्नांची फैरी झाडण्यात आल्या. त्यावर सचिवाने माझ्यावर गटविकास कार्यालयात पंचांनी तक्रार दाखल केली असून मी ग्रामसभेत उत्तर देऊ शकत नसल्याचे सांगितले.

याआधी, ५ लाख ७४ हजारांच्या खर्चावरून गेल्या रविवारीही सुद्धा ग्रामसभेत जोरदार खडाजंगी झाली होती. ग्रामस्थांनी या खर्चाचा तपशील सविस्तर द्यावा, अशी मागणी करत सरपंच संजना नार्वेकर आणि सचिव संदीप हल्ल्याळे यांना धारेवर धरले होते.

वाढता गोंधळ पाहून सरपंचांनी ग्रामसभा तहकूब केली होती. त्यानंतर (ता. १२) झालेल्या ग्रामसभेत सरपंच संजना गांवकर यांनी सचिवाने आपल्याजवळ सातही वॉर्डातील ‘ओटीपी’ मागितले तेव्हा आपण ते दिली. ‘व्हाउचर’वर जी नावे आहेत त्याबद्दल काहीही माहिती नाही नसल्याचे सांगितले.

पोलिसही उपस्थित

ग्रामसभा अर्ध्यावर सोडून जाण्याचा प्रयत्न करणाऱ्या सचिवाला सभागृहाबाहेर जाण्यास ग्रामस्थांनी मज्जाव केला. कायदा सुव्यवस्था बिघडू नये, यासाठी कुळे पोलीस उपनिरीक्षक निबांळकर आपल्या फौज फाट्यासह उपस्थित होते.

माझ्याविरुद्ध षडयंत्र

आमच्या पंचायत मंडळच्या कारकिर्दीत कोणत्याही प्रकारचा घोटाळा झाला नाही. सचिव यांनी जो पंचायत निधीचा गैरवापर केला आहे त्याविरुद्ध आम्हीच गटविकास अधिकाऱ्याकडे तक्रार दाखल केलेली आहे. १७ रोजी गटविकास अधिकाऱ्याने सुनावणी ठेवली असून त्यानंतरच सर्व स्पष्ट होणार आहे. मी जिल्हा पंचायत निवडणुकीत उभा राहणार असल्याने या लोकांनी माझ्याविरुद्ध चालविलेले एक षडयंत्र आहे, असे पंच शिरीष देसाई यांनी आज सांगितले. दुसरीकडे, विपिन नाईक म्हणाले, की ग्रामसभेत उपस्थित असलेला प्रशांत नाईक यांनी मला धमकी दिली असून त्याविरुद्ध मी पोलिस स्थानकात तक्रार दाखल केली आहे.