मडगाव: ॲड. प्रतिमा कुतिन्हो यांना रविवार (दि. १५ डिसेंबर) रोजी मडगाव पोलिसांनी अटक केली आहे. काँग्रेसमध्ये असताना वर्ष २०२० मध्ये एका आंदोलनात 'राम नाम सत्य है' असा उच्चार केल्याप्रकरणी मडगांव पोलिसांनी प्रतिमा कुतिन्होंना अटक केली. "मी कायद्याचे पालन करणारी नागरिक आहे आणि गोव्यातील लोकांसाठी माझा लढा कायम राहील" असे उद्गार अटकेच्यावेळी प्रतिमांनी काढले.

वर्ष २०२० मध्ये महिला काँग्रेसच्या अध्यक्षा असताना इंधन वाढीच्या मुद्यावर निषेध दर्शविताना एका आंदोलनमध्ये प्रतिमा यांनी 'राम नाम सत्य है' असे उद्गार काढले होते. या प्रकरणामुळे गोव्यातील हिंदू समाजाच्या भावना दुखावल्या गेल्याच्या आरोपाखाली ॲड. प्रतिमा कुतिन्हो यांना मडगाव पोलिसांनी त्यांच्या राहत्या घरी म्हणजेच नावेली येथून अटक केली आहे.

"मला मानसिक त्रास देण्यासाठी हा कट रचला गेला आहे, हा पीआय तुळशीदास नाईक मडगाव पोलीस ठाण्यात इतके वर्षे कसा आहे? ह्याचावर कोणाचा हात आहे?" प्रतिमा यांनी अटकेनंतर असा सवाल उपस्थित केला आहे.