Pratima Coutinho : भाजप सरकारच्या गोव्यातील आंधळ्या कारभारावर उजेड टाकण्यासाठीच दिल्लीत धरणे

Pratima Coutinho Slams Goa Government : ओल्ड गोवा येथे युनेस्को हेरिटेज क्षेत्रात जो बेकायदेशीर बंगला उभारण्यात आला आहे तो दिल्ली येथील उच्च पदस्थ भाजप महिला नेत्याचा असून त्यासाठीच गोव्यातील भाजप सरकार या बेकायदेशीर बांधकामांकडे दुर्लक्ष करत आहे असा आरोप आपच्या नेत्या प्रतिमा कुतीन्हो यांनी केला.

गोव्यातील भाजप सरकारचा हा आंधळा कारभार चव्हाट्यावर मांडण्यासाठीच आम्हीं दिल्लीत धरणे धरले अशी माहिती त्यांनी दिली.

या बंगल्याच्या विरोधात गोव्यातील आंदोलकांनी हल्लीच दिल्ली येथील जंतर मंतर मैदानावर धरणे धरले होते. त्याची माहिती देण्यासाठी आज मडगाव येथे घेतलेल्या पत्रकार परिषदेत या बंगल्याच्या विरोधात राष्ट्रपती, प्रधानमंत्री आणि केंद्रिय सांस्कृतिक मंत्री यांच्या कार्यालयात निवेदने दिल्याची माहिती त्यांनी दिली. या पत्रकार परिषदेला कुतीन्हो यांच्या व्यतिरिक्त शंकर पोळजी, ग्लेन काब्राल, अँथनी डिसिल्वा व इफ्तीयाझ सय्यद हे उपस्थित होते.

हे बांधकाम पुरातत्व संरक्षीत क्षेत्रांत येत असूनही या बेकायदेशीर बांधकामाविरोधात हे खाते करवाई का करत नाही असा सवाल करून आपल्याच संरक्षीत जागा हे खाते राखून ठेऊ शकत नाही तर अशा खात्याची काय गरज असा सवाल शंकर पोळजी यांनी यावेळी केला.