Ponda : आयुष्य आणि वेळ या दोन्ही गोष्टी एकमेकांशी संबंधित असून वेळेचे महत्त्व जाणाल तर आयुष्यात यशस्वी व्हाल, अशी शिकवण आपल्याला मिळते. शाळा, विद्यालयातून शिक्षकांकडून विद्यार्थ्यांना वेळेचे व्यवस्थापन शिकवले पाहिजे, असे सांगून मडकईच्या केंद्र शाळेने शंभर वर्षे पार केली ही मडकईवासीयांसाठी अभिमानाची बाब असल्याचे उद्‍गार वीजमंत्री सुदिन ढवळीकर यांनी काढले.

मडकईतील केंद्र सरकारी प्राथमिक शाळेच्या शतक महोत्सवी वर्ष सोहळ्याचे उद्‍घाटन वीजमंत्री ढवळीकर यांच्या हस्ते आज (शुक्रवारी) करण्यात आले. यावेळी जि.पंचायत उत्तर गोवा मुख्याधिकारी अजय गावडे, जि.पं. सदस्य दामोदर नाईक, मडकईचे सरपंच शैलेंद्र पणजीकर तसेच माजी शिक्षणाधिकारी व्ही. डी. नाईक, मडकई पंचायतीचे इतर सर्व पंचसदस्य, पालक शिक्षक संघाच्या अध्यक्ष सीमा गावडे, तिरुपती देवस्थानचे शिव साई व इतर मान्यवर मंडळी उपस्थित होती.

सुदिन ढवळीकर म्हणाले की, पोर्तुगीजांच्या जुलमी राजवटीतही मडकईच्या या केंद्र शाळेने आपले अस्तित्व टिकवून ठेवले. या शाळेत शिकून अनेकजण मोठे झाले. नव्या शिक्षण पद्धतीचे स्वागतच केले पाहिजे. अजय गावडे म्हणाले की, शाळा आणि गाव हे समीकरण विद्यार्थ्यासाठी महत्वाचे आहे. यावेळी निवृत्त तसेच शिक्षक, शिक्षिका, गुणवंत विद्यार्थ्यांचा सत्कार मंत्री ढवळीकर यांच्या हस्ते झाला. सूत्रसंचालन गिरीश वेळगेकर, रंजना घैसास यांनी केले.

निवृत्त शिक्षकांचे विद्यार्थ्यांबद्दल कौतुकोद्‍गार!

राज्य सरकारने तसेच पालक शिक्षक संघटनेच्या सहकार्याने या शंभर वर्षांच्या शाळेचे नूतनीकरण केले आहे. या शंभर वर्षांत शाळेत शिकवलेल्या शिक्षक आणि शिक्षिकांचा सत्कार करताना त्यासाठी निवृत्त होऊन दहा बारा वर्षे झालेल्या शिक्षकांचा पत्ता मिळवून माजी विद्यार्थी संघटनेने प्रत्येक शिक्षकाला मानाने या कार्यक्रमाला बोलावले होते. त्यामुळे निवृत्त शिक्षक व शिक्षिकांनी या माजी विद्यार्थ्यांबद्दल कौतुकोद्‍गार काढले.