पणजी: अर्धवेळ नोकरी देण्याच्या बहाण्याने सायबर फसवणूक केलेल्या मुंबईस्थित जगदीश अशोक बोकोलिया (वय २६ वर्षे, रा. चेंबूर) या तरुणाला पर्वरी पोलिसांनी मुंबईत अटक केली. या प्रकरणात आंतरराज्य सायबर टोळी गुंतल्याचा पोलिसांचा संशय आहे. पर्वरीतील एका रहिवाशाला या टोळीने जीपे, एटीएम अशा विविध माध्यमांद्वारे रक्कम जमा करण्यास लावून सुमारे ९.५० लाखांना गंडा घातल्याची तक्रार नोंद झाली होती.

पर्वरी पोलिसांनी दिलेल्या माहितीनुसार, अज्ञाताने २५ मे ते २ जून या काळात तक्रारदाराला अर्धवेळ नोकरीची ऑफर देत त्याला प्रतिरेटिंग ४० रुपये परतफेड करण्याचे आश्‍वासन दिले होते. त्यासाठी टेलिग्राम ॲप इन्स्टॉल करून सुरुवातीचे काम पूर्ण करण्याचे निर्देश देत ९ लाख ५० हजार १४९ रुपये देण्यास प्रवृत्त केले.

तक्रारदाराने ही रक्कम जमा केली. त्यानंतर तक्रारदाराने अज्ञात इसमाशी टेलिग्राम ॲपवरून संपर्क साधण्याचा प्रयत्न केला असता, तो उपलब्ध झाला नाही. त्यामुळे आपण फसलो गेल्याचे कळताच त्याने पोलिसांत तक्रार दाखल केली होती. पर्वरी पोलिसांनी बीएनएसच्या कलम ३१९(२) आणि आयटी कायद्याच्या कलम ६६-ड अंतर्गत गुन्हा दाखल करून तपास सुरू केला.

तपासादरम्यान, पर्वरी पोलिसांनी अनेक बँक खाती आणि फोन नंबरचे विश्लेषण केले. त्यावरून असे आढळून आले, की या गुन्ह्यात अनेक लोक सहभागी आहेत आणि तांत्रिक देखरेखीच्या आधारे एक संशयित मुंबईत असल्याचे आढळून आले.

त्यामुळे पर्वरीचे उपनिरीक्षक अरुण शिरोडकर, कॉन्स्टेबल आकाश नावेलकर, हेमंत गावकर आणि ऋषिकेश शेटगावकर यांचा समावेश असलेले पथक २८ जून २०२५ रोजी तात्काळ मुंबईला गेले आणि त्यांनी स्थानिक पोलिसांच्या मदतीने संशयिताला अटक केली. पोलिस अधीक्षक राहुल गुप्ता आणि उपअधीक्षक विश्‍वेश कर्पे यांच्या मार्गदर्शनाखाली निरीक्षक राहुल परब हे या टोळीतील इतरांचा शोध घेत आहेत.