फोंडा तालुक्यातील केरी गावातील पालसरेवाड्यावरील निशा तुकाराम सतरकर ही महिला गव्‍याच्‍या हल्ल्यात जखमी झाली. त्‍यांच्‍या पायाला जबर दुखापत झाली असून 21 टाके पडले आहेत.

ही घटना काल शुक्रवारी सकाळच्या सुमारास घडली. या भागात गव्यांचा मुक्त संचार असल्याने लोकांमध्ये भीतीचे वातावरण पसरले आहे.

केरी गावातील आमाडी व पालसरे या वाड्यावर गव्यांचे वास्तव्य आहे. या भागातील बागायतदारांनी काबाडकष्ट करून लागवड केलेल्या पिकांची वारंवार गव्यांकडून नासाडी केली जाते.

पिकांची नासधूस होत असल्याने बागायतदारांना मोठे नुकसान होते. हा भाग कुळागर व बागायतीने नटलेला असल्याने कुळागरी पीक हेच येथील काही लोकांचे उदरनिर्वाहाचे साधन आहे.

आमाडी ते पालसरे या रस्त्यावरही गवे सर्रासपणे फिरताना लोकांच्या नजरेस पडले आहेत. काल घडलेल्या घटनेमुळे लोकांमध्ये भीती निर्माण झाली आहे. वन खात्याने गव्यांचा त्वरित बंदोबस्त करावा अशी मागणी, स्थानिकांशी केली आहे.

बहीण सुमनने वाचविला निशाचा जीव

निशा आणि त्‍यांची बहीण सुमन ही पालसरे येथील डोंगराळ भागात अळंबी शोधण्यासाठी गेल्‍या होत्‍या. त्यांच्यासोबत तीन कुत्रेही होते. कुत्र्यांना गव्‍याचा वास लागताच ते त्‍याच्‍यासमोर उभे ठाकले. पण गव्‍यापुढे कुत्र्यांचे काही चालले नाही.

त्‍याने कुत्र्यांचा पाठलाग केला. दोन कुत्रे विरुद्ध बाजूने पळाले तर एक कुत्रा निशा यांच्‍या‍जवळ येताच गव्याने निशा यांच्‍या पायावर शिंग मारले व त्‍यांना सुमारे तीन मीटर अंतर फरफटत नेले. त्‍यांच्‍या बहिणीने सुमनने प्रसंगावधान दाखवत हातात कोयता घेऊन गव्याला धाक दाखविला.

त्याबरोबर गवा तिथून निघून गेला. सुमनने दाखविलेल्या धैर्यामुळेच निशा यांचा जीव वाचला. पण त्‍यांच्‍या पायाला जखम झालीच. नंतर त्‍यांना बेतकी येथील प्राथमिक आरोग्य केंद्रात दाखल केले असता २१ टाके घालण्‍यात आले.