पणजी: फोंडा येथील अतिरिक्त सत्र न्यायालयाने शिरवाडा-फोंडा येथील गाजलेल्या पत्नी हत्या प्रकरणातील संशयित आरोपी चेतन गावकर (३४) याच्यावर भारतीय न्याय संहितेच्या कलम १०३(१) अंतर्गत खुनाचा गुन्हा निश्चित करण्याचे आदेश दिले आहेत. मे २०२५ मध्ये घडलेल्या या घटनेत पुराव्यांचे प्राथमिक मूल्यमापन केल्यानंतर अतिरिक्त सत्र न्यायाधीश बोस्को रॉबर्ट्स यांनी हा निर्णय दिला.

सरकारी पक्षाने केलेल्या दाव्यानुसार, ३१ मे २०२५ रोजी संध्याकाळी चेतन गावकर याने झोपेत असलेल्या आपल्या पत्नीच्या डोक्यावर दगडाने दोन वार करून तिची हत्या केली होती.

कौटुंबिक वादातून आणि पत्नीच्या वागणुकीवर संशय असल्याने त्याने हे टोकाचे पाऊल उचलल्याचे सांगण्यात आले. घटनेनंतर आरोपीने स्वतः फोंडा पोलीस स्थानकात जाऊन गुन्ह्याची कबुली दिली होती आणि घराच्या चाव्या पोलिसांकडे सोपवल्या होत्या.

ही घटना रागाच्या भरात घडली आहे, त्यामुळे हा ''खून'' नसून ''सदोष मनुष्यवध'' मानला जावा असा दावा बचाव पक्षातर्फे करण्यात आला होता. न्यायालयाने हा दावा फेटाळून लावला. न्यायमूर्तींनी नमूद केले की, संशयिताला पत्नीच्या वागणुकीबद्दल वर्षभरापासून माहिती होती, त्यामुळे ही घटना ''अचानक उद्भवलेला राग'' नसून नियोजनबद्धरीत्या केलेले कृत्य असल्याचे प्रथमदर्शनी दिसून येते.