पणजी: उत्तर गोवा जिल्हाधिकाऱ्यांनी काढलेल्या आदेशानुसार नव्या पाटो पुलावरून पणजीत येणाऱ्या वाहनांसाठी तीन दिवस हा मार्ग बंद करण्यात आला आहे. त्यामुळे वाहनचालकांना जुन्या पाटो पुलावरून शहरात प्रवेश करावा लागत आहे. साहजिकच मळा आणि शहरातील अन्य रस्त्यांवरील वाहतुकीचा ताण वाढला असून, वाहतूक कोंडीचे प्रकार घडत आहेत.

सकाळी ऐनवेळीच रस्ता दुरुस्तीचे काम सुरू झाल्याने पणजीत येणाऱ्या वाहनांना माघारी फिरावे लागले. पणजी शहरात जाणाऱ्या पाटो पुलाचा मार्ग २० ते २२ फेब्रुवारीपर्यंत बंद राहणार आहे. सलग तीन दिवसांच्या कामानिमित्त या मार्गावरील वाहतूक वळविली आहे. सकाळच्या वेळी नवीन पाटो पुलावर दुतर्फा वाहतूक करण्यास परवानगी असेल.

विद्यार्थी, नोकरदारांना फटका

शुक्रवारी वाहतुकीवरही या बंदीचा परिणाम झाला. शाळा सुटण्याच्या वेळी आणि सायंकाळी शहरातून बाहेर पडणाऱ्या मार्गांवर वाहतूक कोंडीचा प्रकार मोठ्या प्रमाणात दिसून आला. वाहतूक कोंडीचा फटका बसल्यामुळे पणजीतील उद्योजक दत्तप्रसाद नाईक यांनी तीव्र नाराजी व्यक्त केली.

वारंवार निखळते लोखंडी प्लेट

या मार्गावर काही आठवड्यांपूर्वीच केलेल्या दुरुस्तीनंतर पुन्हा त्याच कामाची दुरुस्ती करण्यात येत आहे. येथील लोखंडी प्लेट पुन्हा निखळली असल्याने तिची दुरुस्ती करणे आवश्यक आहे. त्यासाठी खालील बाजूने जोडकाम करणे महत्त्वाचे आहे. या कामासाठी तीन दिवसांचा अवधी लागणार असून, तो रस्ता आजपासून बंद राहील, असे जिल्हाधिकाऱ्यांनी जाहीर केले.