पणजी: पणजीत स्मार्ट सिटीअंतर्गत रस्त्यांची व पदपथांची जेवढी कामे झाली आहेत, त्यातील कोणता रस्ता आणि कोणता पदपथ आता कधी फोडला जाईल हे सांगता येणार नाही. कारण शहरातील हॉटेल व्यावसायिकांचे आता डोळे उघडले असल्याने कदाचित त्यांना भूमिगत गॅस वाहिनीद्वारे मिळणाऱ्या नॅचरल गॅसची गरज भासू लागली आहे. त्यामुळे स्मार्ट सिटीअंतर्गत तयार झालेले पदपथ फोडून गॅसवाहिन्या जोडणीचे काम केले जात आहे.

स्मार्ट सिटीची (Smart City) कल्पनाच रस्ता किंवा पदपथ पुन्हापुन्हा फोडू नये अशी असताना अनेक ठिकाणी पुन्हा खोदकाम सुरू झाले आहे. गॅस वाहिनीच्या जोडणीसाठी एकाच बाजूने विविध वाहिन्या टाकण्यात आल्या आहेत, परंतु गॅस वाहिनी ही जमिनीत अधिक खोलीवरून गेली असल्याने त्या वाहिनीसाठी मुख्य वाहिनीला जोड देण्यासाठी प्रवाह मार्ग सोडलेला नाही. त्यामुळे मुख्य वाहिनीली गॅस वाहिनी जोडण्यासाठी स्मार्ट सिटीचे झालेले काम पुन्हा फोडावे लागत आहे.

काही आठवड्यांपूर्वी नाबार्ड बँकेच्या इमारतीजवळील पदपथ खोदकाम करून हॉटेलधारकाने गॅस वाहिनी आपल्या स्वयंपाकघरापर्यंत नेली होती. आता असाच प्रकार सध्या मध्य शहरात ओझरी येथील डॉ. पी. शिवगावकर मार्गावरील एका इमारतीच्या खालील स्मार्ट सिटीअंतर्गत पूर्ण झालेला पदपथ पुन्हा खोदण्यात आला आहे.

उशिरा सुचलेले शहाणपण

१८ जून मार्गाच्या बाजूला असणाऱ्या हॉटेलच्या (Hotel) स्वयंपाकघरासाठी पदपथाचा मध्यभाग खोदून गॅसवाहिनी स्वयंपाक घरात नेण्यात आली आहे. व्यावसायिक गॅस सिलिंडरचे दर कमी-जास्त होत असतात, परंतु त्याच्या तुलनेत भूमिगत वाहिनीद्वारे येणारा नॅचरल गॅस हा परवडणारा असतो. त्यासाठी अनेक घरांतून आणि प्रकल्पांतून गॅसपुरवठा वाहिनींद्वारे होऊ लागला आहे. काही ठिकाणी मात्र ही सेवा कधी सुरू होणार याची वाट पाहिली जात आहे. मात्र, हॉटेल व कारखान्यांना हा गॅस निश्चित फायदेशीर असल्याचे आता त्याचा साक्षात्कार हॉटेल व्यावसायिकांना होऊ लागला आहे, असे वाटते.