डिचोली: नार्वे गावात मोकाट गुरांची समस्या दिवसेंदिवस गंभीर बनत चालली आहे. दिवसरात्र गावातील रस्त्यांवर भटकंती करणाऱ्या या मोकाट गुरांचा गावातून जाणाऱ्या कोकण रेल्वेच्या रुळावरही संचार वाढला आहे.

रुळावर ठाण मांडणाऱ्या गुरांना रेल्वेची धडक बसून गुरांचे बळी जाण्याचे प्रकारही वाढत आहेत. कोकण रेल्वेनेही या प्रकाराची गंभीर दखल घेताना गुरे मोकाट सोडणाऱ्या शेतकऱ्यांवर कायदेशीर कारवाई करण्याचा विचार चालविला आहे.

दरम्यान, गावात मोकाट फिरणाऱ्या गुरांना पकडून त्यांची गोशाळेत रवानगी करण्याचा निर्णय नार्वे पंचायतीने घेतला आहे. नार्वे गावात फेरीधक्का आदी परिसरात तर खासकरून रात्रीची मोकाट गुरांची समस्या अधिक जाणवते. सर्वत्र कळपाने गुरांचा वावर असतो.

रस्त्यावरील गुरांच्या मुक्त संचारामुळे वाहने हाकताना वाहनचालकांना कसरत करावी लागते. मोकाट गुरांच्या वाढत्या संचारामुळे एखादेवेळी भयानक अपघात घडण्याची शक्यता नाकारता येत नाही, तशी भीतीही वाहनचालक व्यक्त करीत आहेत. ही गुरे शेती-बागायतींचीदेखील नासधूस करतात.

दरम्यान, मोकाट गुरे रात्रीच्यावेळी गावातून गेलेल्या रेल्वेच्या रुळावर विसावा घेतात. त्यामुळे रेल्वे आल्यावर रुळावर ठाण मांडणाऱ्या गुरांचे नाहक बळी जातात. या गुरांमुळे एखादेवेळी रेल्वे रुळावर मोठी दुर्घटना घडण्याची शक्यताही नाकारता येत नाही.

अधिकाऱ्यांकडून कायदेशीर कारवाईचा इशारा

गेल्या वर्षभरात रेल्वेची धडक बसून नार्वे गावात २५च्या आसपास गुरांचे बळी गेले आहेत, अशी माहिती मिळाली आहे. नार्वे गावात रेल्वे रुळावरील मोकाट गुरांचा संचार आणि अपघातांची कोकण रेल्वेनेही गंभीर दखल घेतली आहे.

बावीस दिवसांपूर्वी म्हणजेच ३ मे रोजी कोकण रेल्वेचे पोलिस अधिकारी नार्वे गावात येऊन त्यांनी मोकाट गुरांविरोधात जागृती केली होती. गुरांना रेल्वे रुळावर सोडू नका, अन्यथा कायदेशीर कारवाई करण्यात येईल, असा इशाराही या अधिकाऱ्यांनी ग्रामस्थांना दिला होता.