बोरी: वीज मंत्री सुदिन ढवळीकर यांनी त्यांना कार्यतत्परतेने मिळालेल्या खात्याचा वापर गोमंतकीय जनतेच्या विकासासाठी आणि प्रगतीसाठी करावा. वीजखाते हे महत्त्वाचे खाते गोव्यात दीपस्तंभासारखे आहे. त्याद्वारे राज्याला प्रगतीचा प्रकाश देऊन अंधकार दूर करावा, आम्ही सर्व जनता तुमच्या पाठीशी खंबीरपणे उभे राहणार आहोत, असे प्रतिपादन कपिलेश्वरीच्या श्री कपिलेश्‍वर सेवामंडळचे अध्यक्ष दिवाकर शिंक्रे यांनी केले.

रविवार 17 रोजी मंडळाच्या पदाधिकाऱ्यांनी महालक्ष्मी बांदोडा येथील मंत्री सुदिन ढवळीकर यांच्या निवासस्थानी भेट देऊन त्यांचा गौरव केला. यावेळी दिलीप कपिलेश्‍वरकर, संदीप रायकर, हरिप्रसाद कपिलेश्‍वरकर, प्रमोद कुर्डीकर, लक्ष्मीकांत कपिलेश्‍वरकर, देविदास नाईक आदी मान्यवर उपस्थित होते.

मंत्री ढवळीकर म्हणाले, की मडकई मतदारसंघाबरोबरच राज्याचा चौफेर विकास करण्यासाठी माझे प्रयत्न राहणार आहेत. गरीब दुबळ्यांचे प्रश्‍न सोडवण्यासाठी आणि सर्वसामान्यांच्या समस्या दूर करणे हे माझे मी कर्तव्य समजतो. कपिलेश्‍वर सेवा समितीने माझा गौरव केल्याबद्दल कृतज्ञता व्यक्त केली. हरिप्रसाद कपिलेश्‍वरकर यांनी स्वागत केले.दिलीप कपिलेश्‍वरकर यांनी आभार मानले.