तळपण-गालजीबाग रस्त्याकडे बांधकाम खात्याचे दुर्लक्ष

काणकोण: पैंगीण पंचायत क्षेत्रातील तळपण- गालजीबाग अंतर्गत रस्ता खचू लागला आहे, मात्र याकडे सार्वजनिक बांधकाम खात्याचे अभियंते दुर्लक्ष करीत असल्याच्या स्थानिकांच्या तक्रारी आहेत.

सादोळशे ते तळपण रस्ता तळपण नदीच्या पात्राला समांतर आहे. तर गालजीबाग रस्त्याचा सुमारे तीनशे मीटरचा भाग नदीच्या पात्राला समांतर नदी काठावरून जातो. या दोन्ही रस्त्यांवरून चाररस्ता ते माशे पर्यंतचा मनोहर पर्रीकर बगल चौपदरी रस्ता बांधताना मोठ्या प्रमाणात अवजड वाहनांची रहदारी झाली.

त्याचप्रमाणे आता हॉटमिक्स डांबरीकरणासाठीही याच मार्गावरून वाहतूक होत आहे, त्यामुळे तळपण रस्त्यावर मोठे खड्डे पडले आहेत. ते पावसाळ्यापूर्वी न बुजविल्यास पावसाळ्यात गंभीर समस्या उद्‍भवण्याची शक्यता येथील रूद्रेश नमशीकर यांनी व्यक्त केली आहे.

गालजीबाग नदी पात्राला समांतर असलेल्या फोंडले येथील रस्त्याच्या कडेला नदी काठावर दूरध्वनीचे केबल घालण्यासाठी चर खणल्याने आधीच खचलेला रस्ता मोठ्या प्रमाणात खचला आहे. या रस्त्याच्या कडेला संरक्षक कठडा नाही, त्यामुळे वाहने थेट नदीच्या पात्रात कोसळण्याची भीती आहे,असे येथील स्थानिकांनी सांगितले.