River Information System Update

पणजी: खाणी सुरू झाल्यावर नदीतून बार्जची वाहतूक वाढेल, असे असले तरी ही वाहतूक सुरळीत होण्यासाठी आवश्यक असलेली नदी माहिती प्रणाली बसवण्यासाठी बंदर कप्तान खात्याकडून चालढकल सुरू आहे. राज्यातील सहा नद्या या राष्ट्रीय जलमार्ग ठरवल्याने ही प्रणाली बसवण्यासाठी भारतीय अंतर्देशीय जलमार्ग प्राधिकरणाकडून निधी मिळणार असूनही तो घेतला जात नसल्याची धक्कादायक माहिती मिळाली आहे.

राज्यातील जलमार्गांचा वापर जास्तीत जास्त व्हावा, यासाठी प्रयत्न करण्याचे राज्य सरकारने ठरवले आहे. हे जलमार्ग यांत्रिक नौकांसाठी वापरण्यायोग्य करण्यात येत आहेत. सागरमाला प्रकल्पांतर्गत धक्के बांधण्याचे काम हाती घेण्यात येत आहे.

अंतर्देशीय जलवाहतुकीचा वापर वाढवण्यासाठी आणि त्यातील अडचणी दूर करण्यासाठी या प्रणालीसारख्या आधुनिक तंत्रज्ञानाची आवश्यकता आहे. या प्रणालीच्या मदतीने जलवाहतुकीतील सुरक्षा, कार्यक्षमता आणि पर्यावरणीय संरक्षण सुनिश्चित करता येते, ज्यामुळे अंतर्देशीय जलमार्गांचा अधिक प्रभावी आणि व्यापक वापर शक्य होणार आहे. बार्ज वाहतूक वाढल्यावर या प्रणालीची गरज प्रकर्षाने जाणवणार आहे.

नदी माहिती प्रणाली म्हणजे काय?

नदी माहिती प्रणाली ही एक आधुनिक तांत्रिक प्रणाली आहे जी अंतर्देशीय जलमार्गांवरील जलवाहतुकीचे व्यवस्थापन आणि नियंत्रण सुलभ करते. ही प्रणाली जलवाहतुकीतील सुरक्षा, कार्यक्षमता आणि पर्यावरणीय संरक्षण वाढवण्यासाठी विकसित करण्यात आली आहे. RIS मध्ये रडार, ऑटोमॅटिक आयडेंटिफिकेशन सिस्टम , इलेक्ट्रॉनिक चार्ट डिस्प्ले आणि इन्फर्मेशन सिस्टम यांसारख्या तंत्रज्ञानांचा समावेश असतो, ज्याद्वारे जलवाहतूक नियंत्रण केंद्रांना वास्तव वेळेत जहाजांची माहिती मिळते.