महाराष्ट्राच्या सागरी हद्दीत एलईडी मासेमारी उपकरणांचा वापर करून मासेमारी केल्याप्रकरणी गोव्यातील दोन ट्रॉलर्सवर मोठी कारवाई करण्यात आली. या ट्रॉलर्सना महाराष्ट्राच्या मत्स्यव्यवसाय विभागाच्या अधिकाऱ्यांनी जप्त केले आहेत.

या पार्श्वभूमीवर महाराष्ट्र शासनाने एलईडी मासेमारीविरुद्ध कठोर भूमिका घेतली आहे. राज्याचे मत्स्यव्यवसाय मंत्री नितेश राणे यांनी स्पष्ट शब्दांत सांगितले की, “एलईडी मासेमारी कोणत्याही परिस्थितीत खपवून घेतली जाणार नाही, जप्त केलेले गोव्यातील ट्रॉलर्स ताब्यातच राहणार” असं नितेश राणे म्हणालेत.

गुरुवारी (ता. २०) करण्यात आलेल्या या कारवाईदरम्यान, संबंधित ट्रॉलर्सने महाराष्ट्राच्या सागरी हद्दीचे उल्लंघन केल्याची माहिती अधिकाऱ्यांनी दिली. स्थानिक कायदे आणि मत्स्य व्यवसाय संबंधी नियमांनुसार अशाप्रकारची मासेमारी बेकायदेशीर असून, याविरुद्ध कठोर कारवाई करण्याचे आदेश पूर्वीपासूनच देण्यात आले होते.

एलईडी लाईटच्या वापरामुळे मोठ्या प्रमाणावर मासे एका ठिकाणी आकर्षित होतात. त्यामुळे नैसर्गिक संतुलन बिघडण्याची आणि सागरी जीवसृष्टीवर गंभीर परिणाम होण्याची शक्यता वाढते. याचा थेट परिणाम स्थानिक मच्छीमारांच्या उपजीविकेवर होत असल्याने या पद्धतीला महाराष्ट्रात पूर्णतः बंदी आहे.