मोरजी: मांद्रे मतदारसंघातील मोरजी , मांद्रे व हरमल या किनारी भागात मोठ्या संख्येने लमाणी कपडे विक्रेत्या बेकायदा व्यवसाय करत असून किनारी भागात देशी व विदेशी पर्यटक लाकडी पलंगावर आराम करीत असताना त्या पर्यटकांना त्रास देत असतात. त्रास देणाऱ्या लमाणी विक्रेत्यांवर कडक कारवाई करावी, अशी मागणी व्यावसायिक प्रमेश मयेकर यांनी केली आहे .

पर्यटन हंगाम म्हटला,की केवळ संगीत पार्ट्या आणि मादक पदार्थच महत्वाचे नसतात, त्याला जोडूनच , चोऱ्या ,मारामाऱ्या, फसवणूक ,विनयभंग , बलात्कार यासारखेही प्रकार घडत असतात. यातच आता किनारी भागातील भटक्या लमाणी कपडे विक्रेत्या व भिकाऱ्यांच्या उपद्रवाची भर पडली आहे.

पर्यटन हंगाम नोव्हेंबरपासून एप्रिलपर्यंत चालतो, या हंगामात पाच महिने व्यावसायिक व्यवसाय करतात,अन् त्यावरच उदरनिर्वाह चालतो. पर्यटन हंगामात सर्वात प्रथम आपला व्यवसाय थाटण्यासाठी येतात, त्या लमाणी कपडे विकेत्या. व्यावसायिक किनारी भागात खोल्या भाडेपट्टीवर घेऊन बिऱ्हाड थाटतात. स्त्यालगत अतिक्रमण करून स्टॉल घालतात. नंतर किनारी भागात जिथे विदेशी पर्यटक समुद्र स्नान करून आराम करत असतात, तिथे जाऊन पर्यटकांना त्रास देत कपडे घ्यावेत, म्हणून त्यांच्या मागे लागतात. कपडे घ्या म्हणून त्यांचा पिच्छा पुरवतात. काही महिला,युवती तर विदेशींना मसाजसाठीही पाठीमागे लागतात.

मांद्रे मतदार संघातील किनारी भागात सध्या लमाणी कपडे विकेत्यांचा वावर वाढला असून त्यांच्यावर कारवाई करावी, अशी मागणी व्यावसायिक प्रमेश मयेकर यांनी केली आहे .

आम्ही पर्यटक किनारी आराम करण्यासाठी आणि पर्यटनाचा आनंद लुटण्यासाठी येतो मात्र किनारी भागात फिरणाऱ्या मोठ्या प्रमाणात कपडे विक्रेत्या सतावतात. शिवाय यांच्या तगाद्यामुळे व आवाजामुळे ध्वनिप्रदूषणही होते.

-आलेक्स पोस्को

किनारी भागात मोठ्या प्रमाणात फिरत्या कपडे विक्रेत्या व भिकारी पर्यटकांच्या मागे लागतात. त्यांच्यावर कारवाई होण्याची गरज आहे. मोकाट गुरे ,भटके कुत्रे यांचीही डोकेदुखी आहे.

-अमोल पांडे