डिचोली: डिचोलीत आयोजित नोकरभरती मेळाव्‍याला उत्स्फूर्त प्रतिसाद लाभला. ३१७ जणांनी त्‍यात सहभाग घेतला. पैकी ८४ जणांना मुलाखतीवेळी लगेच ऑफर पत्रे देण्यात आली.

‘नवचैतन्य युवा पर्व’अंतर्गत उद्योजक चैतन्य उर्फ सनी मानकर यांनी रविवारी (ता. १२) या नोकरभरती मेळ्याचे आयोजन केले होते. ज्येष्ठ महिला सुचिता परब यांच्या हस्ते या मेळ्याचे उद्‌घाटन करण्यात आले. या प्रसंगी चैतन्य मानकर, संदीप पेडणेकर, चैतन्य पाटील, अनिकेत ढोबळे उपस्थित होते.

डिचोली मतदारसंघात बेरोजगारीची समस्या असून, ती सोडविण्यासाठी या नोकरभरती मेळाव्याचे आयोजन करण्यात आले होते. बेरोजगारी सोडविण्यासाठी मी प्रामाणिकपणे प्रयत्न करणार, असे मानकर यांनी सांगितले.

या कंपन्‍यांचा होता सहभाग

बोर्डे-डिचोली येथे आयोजित केलेल्या या नोकर भरती मेळाव्यात ‘महिंद्रा ॲण्ड महिंद्रा, जीनो फार्मास्युटिकल्स, युनिकॅम, क्रॉम्पटन आदी नामवंत उद्योग कंपनी सहभागी झाल्या होत्या. या कंपन्यांनी वेगवेगळे काऊंटर उघडले होते. मेळाव्यात डिचोली मतदारसंघातील वेगवेगळ्या भागातील बेरोजगार युवक-युवती सहभागी झाल्या होत्या.

विविध उद्योग कंपनीकडून युवक-युवतींच्या मुलाखती घेण्यात आल्या. विविध कंपन्यांनी मिळून ८४ जणांना तात्काळ ऑफर पत्रे देण्यात आली. काही बेरोजगारांनी महाराष्ट्रात नोकरीचा प्रस्ताव स्वीकारला आहे. कंपनींनी नोकरीसाठी ऑफर पत्रे दिल्याने युवक-युवतींनी समाधान व्यक्त केले.