Hyderabad Tourists Arrested in Goa For Rash Driving And Two Accidents: हैदराबाद येथील पर्यटकांच्या एका ग्रुपने बेदरकारपणे कार चालवत दोन अपघात केल्याने पर्वरीत मोठा राडा झाला. अपघात झाल्यानंतर पर्यटकांनी घटनास्थळावरून पळून जाण्याचा प्रयत्न केला.

दरम्यान, स्थानिकांनी पाठलाग करून त्यांना पकडून देण्यात पोलिसांना मदत केली. मात्र, यामुळे गुरुवारी रात्री पर्वरीत मोठा तणाव निर्माण झाला.

मिळालेल्या माहितीनुसार, कारमधून प्रवास करणाऱ्या हैदराबाद येथील पर्यटकांच्या एका ग्रुपने बेदरकारपणे वाहन चालवत वागातोर आणि काणका येथे दोन अपघात केले.

दरम्यान, अपघात झाल्यानंतर पर्यटकांनी घटनास्थळावरून पळ काढण्याचा प्रयत्न केला. त्यानंतर स्थानिकांनी त्यांचा पाठलाग करण्यास सुरूवात केली.

अपघाताची पहिली घटना वागातोर येथे घडली, त्यानंतर पर्यटकांनी पळ काढला मात्र, स्थानिकांनी त्यांचा पाठलाग केला. दरम्यान, याचवेळी काणका येथे त्यांच्या वाहनाचा दुसरा अपघात झाला. आणि येथून देखील पर्यटक पसार झाले.

हैदराबादच्या हे पर्यटकनंतर पर्रा रस्त्यावरून गिरी येथे मुख्य रस्त्यावर आले आणि पर्वरीत दाखल झाले. पर्यटकांनी पर्वरीत एका बंगल्यात आसरा घेतला. दरम्यान, त्यांचा पाठलाग करणाऱ्या जवळपास पन्नास स्थानिक लोक बंगल्याजवळ गोळा झाले.

अखेर पोलिसांच्या (Goa Police) मदतीने हैदराबादच्या या पर्यटकांना अटक करण्यात आले. पोलिसांनी त्यांची वैद्यकीय तपासणीसाठी रवानगी केली.

स्थानिकांनी या पर्यटकांच्या विरोधात हिट एन्ड रनची केस दाखल करत, सक्त कारवाई करण्याची मागणी केली आहे. तसेच, अपघातामुळे झालेल्या नुकसानाची भरपाईची देखील मागणी केली आहे.