Found Human Remains In Aldona: सडोवाडो-हळदोणा येथे पोर्तुगीजकालीन घराच्या आवारातील विहिरीत मानवी अवशेष सापडल्याने खळबळ उडाली.

या विहिरीत दोन हाडे व कवटी सापडली असून, ते पुरुषाचे की स्त्रीचे हे समजू शकलेले नाही. म्हापसा पोलिसांनी घटनेचा पंचनामा करून अवशेष उत्तरीय तपासणीसाठी गोमेकॉत पाठवले आहेत.

या घराचे मालक सावियो फर्नांडिस हे मुंबईत वास्तव्याला आहेत. घरात त्यांची नातेवाईक असलेली ८० वर्षीय वृद्धा एकटीच राहते.

घरमालक फर्नांडिस यांनी कंत्राटदारामार्फत या विहिरीची साफसफाई तसेच डागडुजीचे काम दिले होते.

त्यानुसार, चार-पाच कामगार सोमवारी सायंकाळी विहीर उपसण्याचे काम करत असताना त्यांना विहिरीत मानवी अवशेष दिसले.

त्यांनी या घटनेची माहिती तत्काळ म्हापसा पोलिसांनी दिली. पोलिसांनी विहिरीतून दोन हाडे व कवटी बाहेर काढली.

मृत्यू दीड वर्षापूर्वी

ही विहीर 30 ते 40 मीटर खोल असून, या विहिरीचे पाणी घरातील सदस्य वापरायचे. या विहिरीत मानवी अवशेष कसे आले, याचा तपास पोलिस करत आहेत.

विहिरीत सापडलेल्या व्यक्तीचा मृत्यू दीड ते दोन वर्षांपूर्वी झाला असावा, असा पोलिसांचा कयास आहे. म्हापसा पोलिस या प्रकरणाचा तपास करत आहेत.