पर्ये: केरी-सत्तरीच्या हिरव्यागार कृषी पट्ट्यातील युवा आणि गतिमान कृषी उद्योजक सागर तुकाराम माजिक सध्या आपल्या अभिनव उपक्रमामुळे चर्चेत आले आहेत. कृषी पदव्युत्तर शिक्षण आणि प्रत्यक्ष शेतीचा भक्कम अनुभव यांच्या जोरावर त्यांनी गेल्या पाच वर्षांत शेतकरी आणि ग्राहक यांच्यात थेट दुवा निर्माण करण्याचे महत्त्वपूर्ण कार्य उभारले आहे.

सागर यांनी गोवा आणि परिसरातील शेतकऱ्यांचे मजबूत जाळे तयार करत ‘गोवन फार्म’ या ब्रँडअंतर्गत विश्वास, पारदर्शकता आणि ताजेपणावर आधारित ओळख निर्माण केली आहे. त्यांच्या स्वतःच्या आंबा बागांमध्ये मानकुराद व हापूस (आल्फोन्सो) यांसारख्या दर्जेदार जातींची लागवड केली जाते. त्याचबरोबर इतर बागायतदारांशी सहकार्य करून उत्कृष्ट दर्जाचे आंबे थेट ग्राहकांपर्यंत पोहोचवले जातात.

गेल्या दोन वर्षांत त्यांनी आपल्या व्यवसायाचा विस्तार करत पुणे आणि बंगळुरू येथेही गोवा व वेंगुर्ला येथील नैसर्गिक पद्धतीने पिकवलेले आंबे पुरवण्यास सुरवात केली आहे. ग्राहकांना रासायनिक प्रक्रियाविरहित, सुरक्षित आणि निवडक आंबे मिळावेत यासाठी ते विशेष काळजी घेतात.

गेल्या वर्षी उल्लेखनीय कामगिरी

गेल्या वर्षी सागर माजिक यांनी मानकुराद आणि हापूस अशा सुमारे १०० डझन आंब्यांची विक्री केली. त्यांच्या स्वतःच्या सुमारे ५० आंब्याच्या झाडांबरोबरच परिसरातील इतर शेतकऱ्यांच्या उत्पादनालाही त्यांनी योग्य बाजारपेठ उपलब्ध करून दिली होती.

या उपक्रमामुळे शेतकऱ्यांना योग्य दर मिळण्यास मदत होत असून पारंपरिक शेतीला आधुनिक बाजारपेठेशी जोडण्याचे प्रभावी काम घडत आहे. सुरक्षित, दर्जेदार आणि स्थानिक उत्पादनांची वाढती मागणी लक्षात घेता ‘गोअन फार्म’सारखे उपक्रम कृषी क्षेत्रात नवे मापदंड निर्माण करत आहेत.